男人有話兒（９）分手－幾多對持續愛到幾多歲？ 精選 推薦

寫呢個題目，要寫得好小心。所謂寧教人打仔，莫教人分妻。
姻緣得來不易，大家都唔應該輕易講分手。

但係又好現實咁講，分手，其實一啲都唔罕見。
係今時今日，要遇上一個人渣又有幾難。
幾多對持續愛到幾多歲，好多時係拍拖之前，由於雙方既距離比較遠，較容易有想像既空間。係你眼中既對方梗係完美。但係到真係一齊咗之後，雙方經歷咗一段長時間既生活，慢慢對方就會變得現實同清晰好多。到你發現原來對方無你想像中咁好，呢個幻想到真實之間既落差，往往會有人覺得無法適應。而且時間愈長，磨擦愈多。好多時一兩件小事就足以引發世界大戰。

於是無論開初你有幾鐘意個個人都好，終有一日你會發現，好似有啲野係不知不覺間變咗。
到底係你一開始所認識個個佢太假？定係而家呢個佢太真？
然後你就會開始問自己一個問題：應唔應該繼續落去？

亦有時分手唔係對方有問題，反而係自己未準備好同對方一齊。
當然一齊咗先發現呢件事，好似好衰仔咁。之但係如果扮無野繼續落去，會唔會更衰仔呢？
如果話愛情係一個大話，分手就係你發覺自己無辦法用自己既愛繼續呃佢，你無信心可以呃佢一世。

兩個人係埋一齊唔難，只需要有少少既衝動同運氣。所以點解我地成人見到兩個根本唔襯既人走埋一齊，一開始仲相處得好開心。
難在要一齊行落去，因為只要有一方開始覺得攰，就會漸漸萌生出唔想再行落去既念頭。
而呢個念頭一生長落去，最終思考分手只係時間上既問題。

或者分手唔能夠保證實有下一段更好既感情，但係如果而家既你已經唔能夠再從呢段感情中感受到一點開心的話。及早分手未嘗唔係一個出路。即使最後選擇分手，起碼你地曾經真心愛過。然後重新出發，起碼你可以期待遇上下一個你能夠自然，舒服相處既人。
＝＝＝＝＝＝＝＝＝＝＝＝＝＝＝＝＝＝＝＝＝
喜歡的話不要忘了到柳臣fb page給個like支持一下！