毒L點出pool？ 精選

是咁的，作為一個毒Ｌ，就要有作為一個毒Ｌ既自覺，知道自己有咩問題。

　　毒Ｌ多數有幾個問題。第一，樣衰。係，就係樣衰。如果你本身係靚仔靚女，自然會有人溝你，出pool不過睇閣下心情。你可能會話，樣衰我都唔想架喎！天生架喎！不如講個好消息你聽，呢個世界九成人都天生樣衰，只有一成人係天生麗質。所以樣衰其實係有得執，襯下衫，執下個樣，化下妝，個人乾乾淨淨，就已經呃得下人。如果你照鏡時自己都覺得自己個look毒、摺、醜、柒、霉既，咁好難怪冇異性埋你身架喎！
　　第二，唔好咁毒。叫你唔好咁毒，唔係叫你唔好做毒Ｌ。咩叫唔好咁毒，毒Ｌ其實係專家，你可以對日漫韓劇如數家珍，你可以講得出邊套動漫邊個角色係邊個聲優配音，仲知道佢幾時生日。但你可以唔知旺角尖沙咀有咩野食，唔知而家書局有咩新書。唔係要你咩都識，但起碼多Ｄ涉獵唔同範疇既資訊，睇多Ｄ新聞，多Ｄ出去玩，令到人地同你講野既時候，你唔會完全答唔上嘴。

　　第三，學下點同異性正常相處。呢點其實冇咩好教，講白Ｄ就係多Ｄ實戰，少Ｄ ＦＦ，識多Ｄ異性。你當拍拖係運動，都要多Ｄ練習，不斷比賽先會進步啦！多Ｄ比機會自己去識唔同既異性，不論係發展朋友定係男女朋友關係，個pool愈大，出pool既機會自然愈大。