如果用讀書比喻識女仔 精選

忽發奇想，如果用讀書比喻識女仔，大概可以分做五種。

１）唔鐘意讀書
人人都要番學，但唔係人人都鐘意讀書。
有人從來唔讀書，對佢黎講，要佢乖乖地坐係度讀書仲慘過死。
佢可能係運動健將，可能係音樂方面有好高既造詣。
總之佢心不在書，女仔想埋佢身，只能輕嘆神女有心，襄王無夢。

２）為考試而讀書有人讀書并非愛書，但求有個靚既GPA。
佢讀書只為考試，試前試後兩個樣。
考之前視書如珍寶；只係一旦考完試，就恨不得將書一把火燒光。
考完試就將本書拋在一角，不再重視，不屑一顧。
說到底佢愛既只係成績，而唔係書本。
女仔一開始可能會被佢既態度欺騙，但當兩人拍拖不久，男方既態度就會一百八十度轉變。

３）為興趣而讀書
有人熱愛睇書，可惜睇不得其法，只肯睇自己鐘意睇既書。
或天生記性唔好，讀唔入腦；或鐘意睇既書同考試無關。無論佢點大喊：「係考試制度既錯！係社會既錯！」
結果都只有一個，就係佢考試永遠肥佬。
只可以話同市場脫節既人，永遠都唔會受市場歡迎。
佢可以繼續堅持為興趣而讀書，不過就要預左考試十次有九次都會唔合格。

４）睇書只睇封面
對佢黎講，咩書唔重要、本書講咩唔重要、有冇深度唔重要。
有人睇書只睇封面，只要第一眼見到個封面夠吸引，佢就會情不自禁出手買。
書係佢心中，就只係一件用作觀賞擺設既藝術品。
冇人會敲碎唐三彩一窺內裡光景，冇人會理大衛像隻手到底可以掛到幾重既野。
佢深明藝術品既外表有幾重要，佢係外貌協會榮譽會長。佢可以一見鐘情，佢可以一擲千金。
佢現實，你問佢點解淨係揀樣，佢會理所當然咁答你：「唔通揀肥、醜、矮？」

５）博覽群書
有人睇書快過打針，一個月換兩三本書都仲得。
每次見佢，身上本書都同上次唔同。
「舊個本？書完抌咗lu！」佢瀟灑到你以為佢講緊既只係一件微不足道既小事。
換書快過換衫，新書多到你以為佢開書局，有時仲會同一時間睇兩三本書。
雖然佢不停換書，令人覺得佢咩都讀咩都睇，冇乜要求。
其實佢正正係要求好高，一發現本書有少少唔岩睇就即刻換第二本。

咁多種「讀書人」，唔知大家又係邊一種呢？
柳臣fb：https://www.facebook.com/pages/%E6%9F%B3%E8%87%A3/802134759816720