【中文X戀愛】一定要注意愛情中的雙重否定句

男人有話兒 於 13/09/2017 發表 收藏文章
係語意學上,雙重否定句係用黎表達肯定既意思。
例如:我「唔係」「唔」識佢。意味住「我識佢」咁解。
又例如:我「唔係」「冇」錢,就等於「有錢」。
再舉一個例:我唔信都唔得啦。姐係表達「我信」。

咁但係如果呢種句式套在係愛情既語境之下,就完全唔同曬。講反話係人類既自我保護意識,佢未必存心隱瞞,好多時連講咗出口都唔覺。無論男女,當你聽到你既另一半或者心儀既對象講雙重否定句,你到底有冇捉到佢真正既用意呢?
從結論而言,愛情中既雙重否定句多數都係要黎表達否定既意思,而且係要黎解釋「否定既原因」。
例如你向對方表白,對方咁樣回覆你:「我唔係唔鐘意你」
呢個時候你唔洗開心住,你話佢話唔係唔鐘意,咁負負得正姐係鐘意啦!如果咁諗你就錯啦!
因為呢句既真正意思係「我係唔鐘意你」,你要留意既佢係之後落黎個句。
如果佢話:「我唔係唔鐘意你,我只係未準備好拍拖。」,咁呢句雙重否定句其實係話:「我係唔鐘意你,而我拒絕你既原因係我唔準備同你拍拖。」

只要識得解讀愛情中既雙重否定句,你就唔會再傻更更咁自己呃自己。好多啲愛情都係好套路捉,只係好多人都無留心去為意,或者俾自己主觀既情感影響咗自己既客觀判斷。
好!再同大家做多幾次練習:

初階題:
如果你女朋友話:「而家唔係話唔俾你同朋友飲酒。」咁你就要自己醒醒定定啦!因為佢既意思係「唔俾你同朋友飲酒」。

中階題:
當男朋友咁講:「我唔係無考慮過你,我諗住你唔得閒。」呢句又點解呢?佢到底有定無考慮過你呢?
其實用番同一個套路就無問題,重要唔係前面個句,記住愛情中既雙重否定句係要黎「解釋否定既原因」,所以呢句既意思可能係表達緊「佢覺得你成日都唔得閒/佢習慣咗係無詢問你既意見之前就同你做決定。」

高階題:
「我唔係唔鐘意你,我只係唔知道自己會唔會唔習慣」
今次係兩句入面出現咗兩個雙重否定句,唔知大家又識唔識分析呢?
歡迎到柳臣fb page留言講低你既答案。
標籤: 女朋友  男朋友  心儀  表白  拍拖  

留言


請按此登錄後留言。未成為會員? 立即註冊
    快捷鍵:←
    快捷鍵:→