小編親身實試6個追求絕招！原來要吸引對方都不是難事啊 精選 推薦

一直有睇開我文既人都知道我係絕對唔鼓勵大家表白，除非你想比人即時處決 。但唔比表白就搞到好多人問咁要點先吸引對方，以我多年主動追求 最後都成功既經驗，加上啱啱睇動畫又有啲啟發話你知，其實要對方注意你 同埋混熟啲都離不開呢幾步：


1. 入侵對方空間

如果你同佢冇common friend既話，呢步對你黎講就好緊要，因為關乎你同佢可唔可以成功做朋友。首先你唔可以一黎就叫人同你做朋友啦，你應該借啲意叫埋你既朋友幫手，話下個禮拜大家會一齊去海洋公園玩，問佢有冇興趣。甚至如果你同佢連見都未見過面，咁喺網上面第一句就要問佢一啲野，例如：「我見到你有XXX吖！喺邊度買架？」/「唔好意思呀我想問你依家係咪做緊XX？我想請教下你。」

當你地約左出黎之後一定要坐喺對方左邊，因為右手係慣用手寫字會造成阻礙。另外食飯嗰陣最好坐隔離，坐對面又冇野傾會搞到疏遠左架！坐隔離既話距離近左就冇咁尷尬啦。
2. 模仿對方動作同語氣

當然唔係叫你做跟屁蟲，要留意過多模仿反而令人覺得反感，所以你要捉住佢既口頭蟬或者成日打既Emoji/慣做動作，例如：佢成日打「lolllllllllllll」，你就跟住打 / 佢成日話「咁呢咁呢」， 你就照講..........令佢見到覺得有親切感。

3. 改一個你先會講既花名

咁梗係唔係咩Bb豬、Honey呢啲啦，未一齊就咁講想嚇死人咩？！你依家要表現出自己既獨特性，所以你要無意中講出呢個新名，之後再扮講錯，然後反手話都幾襯佢，咁就得你先會用呢個花名喇！例如：佢個名係呀俊，你叫佢俊神；男仔就簡單啲添，直接叫佢做呀(妹：高音)都得。

4. 欲擒故縱
明明主動搵佢但係又要扮到睇錯時間，要睇下Schedule可能約左屋企人定唔知做咩戶外活動，等佢個心十五十六咁等你應佢。

5. 吊橋效應

做一啲大家都好驚既野令雙方心跳加速，一時間會使對方誤以為係中意嗰隻心跳。呢個時候如果挨落佢度話好驚，咁就會產生戀愛既錯覺。

6. 建立共同目標

人為左喺緊急情況下達成共同目的，自然而然就會拉近彼此距離。例如你同佢都係想減肥既，你就比好多減肥建議出黎同佢實行；例如佢好想考到日文試，你就陪佢一齊讀同一班讀日文，總之同佢向同一個目標出發。
最後要提一句，雖然呢啲方法可以幫你同唔太熟既佢拉近距離，但之後都要靠你繼續努力追佢。就算佢最後拒絕左你都冇辦法，因為冇人可以擔保你地熟左之後，佢一定會中意你嘛。
_________________________________________________________________

如果中意我既文可以去我Instagram ：lovestoryhk
或者like我facebook fanpage：紙情
/定期更新愛情文章架，多謝支持/

_________________________________________________________________