女仔呀！就算你中意睇韓仔都好，唔好比韓劇侵蝕呀 精選

由以前藍色生死戀、天國的階梯開始，悲情感動既劇情愈來愈受歡迎，男女主角均以患病做終結，總之要觀眾睇完有強烈痛心既感覺。但係韓劇對人係咪真係有好既影響？拿...我唔係話呢啲劇唔好睇，如果同現實抽離到當然冇問題啦，問題係你根本分唔開呢？！好多女仔以為現實係咁，人地都一樣會受落。


有時direct或者喺forum度睇到主人翁突然身患重病，或者經歷好大既難關(破產、失去雙親、坐監)，通常都唔會同另一半講，因為佢地怕講左出黎令對方擔心。於是佢地選擇隱瞞一切，痛定思痛地提出分手，因為佢地認為咁先係最好既做法。

但大佬呀，你以為自己真係韓劇既男女主角咩？件事咁樣處理會浪費啲架？你諗下，其實你依家身處喺香港，你覺得真係咁容易隱瞞到咩？咁大件事都唔講出黎，自己一個決定兩個人既幸福，除左自私我諗唔到第二個形容詞。最後對方發現嗰陣已經失去同你共度難關既時光，佢到時所面對既打擊同痛心，一定比起你一五一十講出黎更大！
所以無論發生咩事，同另一半討論同面對先係最好做法，否則你既自以為是就會造成對方一生遺憾，甚至親手斷送呢段姻緣💔

_________________________________________________________________

如果中意我既文可以去我Instagram ：lovestoryhk
或者like我facebook fanpage：紙情
/定期更新愛情文章架，多謝支持/
_________________________________________________________________