有史而來最強開話題絕招 精選

傾偈從來都係一個困難既部分，因為唔係人人天生都識開話題。大部分人會覺得尷尬、緊張，甚至有啲缺少同異性傾偈既經驗添，搞到約會既時候會變成口啞啞，唔知講咩好既局面。而以下就係比幾點大家做一個參考：

最近好hit既電影/電視劇

大家放學放工既活動不外乎行街睇戲，所以講呢排最hit既電影實冇死。例如講下必睇既韓劇《鬼怪》，如果佢冇睇過可以話自己咁啱都冇人陪，叫佢食完飯一齊睇埋先返屋企。但如果佢睇過又可以討論下孔劉幾型、套野幾催淚，仲會從中知道佢中意睇咩類型既戲，透過佢欣賞既男/女主角就知佢既理想對象條件啦。
返工返學既趣事

你想同佢呻做野好辛苦係冇問題既，但盡量唔好講咁多事非，因為男仔會覺得你份人好八婆之類。假若真係想分享，可以講下啲搞笑野既：「今日我個同事印錯左十幾份文件出黎，老世叫佢點豉油逐張食曬佢lol。」

星座占卜

普遍香港人都係好迷信，你一講自己識分析星座/睇掌，對方一定會好興奮想知多啲，所以呢類知識真係唔可以少！係非常簡單既開話題方法 零 · 失 · 手！！當然你本身要識識地先幫到人睇，睇既過程可以chok到佢講下自己性格，咁就唔使下下問都仍然了解到佢啦。
因應唔同類型講唔同話題

對住中意食野既對象，你要問佢知唔知XX地方有好野食：「下次我帶你去食吖‼」
對住文青就可以比佢睇下你影既相：「下次同你去呢度影相，感覺好唯美架。」
對住好音樂既才華型，你最好請求佢即場表演一下，佢會好開心：「不如下次我帶容祖兒枝咪一齊jam歌吖」
總之唔同人就講唔同話，當然最好事前搜尋睇下佢係咩類型既人先！


好喇萬一你真係好lun緊張講唔到野，你有兩個方法表達出黎。一係直接講自己既擔心，可能對方會覺得你好可愛添；二係比啲搞笑或者得意寵物相佢睇，等大家笑下就唔使諗話題。
_________________________________________________________________

如果中意我既文可以去我Instagram ：lovestoryhk
或者like我facebook fanpage：紙情
/定期更新愛情文章架，多謝支持/
_________________________________________________________________