愛情信箱64：女朋友一直瞞住我同EX一齊 精選 推薦

問題：

其實係咁，我同我女友年半前一齊左(現在係EX) 我地係早幾日分左手。 對於呢段感情，我唔知點解好放唔低，可能係因為初戀(佢第二戀，我同佢年紀差3.5年，佢黎緊4月考DSE)。 最初識佢幾日就一齊左，呢一個已經係其中一個錯。之後熱戀三個月，佢當時既EX搵返佢，佢話放低左，但其實冇放低。 最後我發現佢偷偷瞞住我見返佢EX，自始我就對佢好大介心同唔信任呢段感情。

佢一開始話佢只係可憐佢，但係我已經變到好敏感，變到成日搵佢，唔比空間佢，我好驚佢一有空間就會搵佢EX，(事後睇返我都覺得自己痴左線) 一星期鬧2 3日架，搞佢呀媽都唔鐘意我。 我好想佢為我改，我試過因為佢未放低佢EX，同埋佢做事無交帶而同佢講分手。 佢喊晒話會改，不過最後都冇改到，佢話以為自己會改到。
直到佢10月個時佢EX話去英國讀書，我先放心啲。 我以為可以鬆一口氣，點知就算佢走左，我女友都係係IG同佢DM。我既敏感始終冇變過，當時我又講分手。但係佢都係話會改，叫我比多少少時間佢。 之後都係老問題，一直鬧架(一星期1-2次) 直到31號佢同我講，佢個心已經唔係到，因為佢始終放唔低，同埋成日鬧架搞到好有離心力。 我答應左，但係佢2小時之後喊晒搵返我，我以為佢真係想修補關係，我都好希望我地既關係可以變返好。不過直到3號 我發現佢同我聯絡既時候已經係冇晒感覺(佢變得好冷淡) 我當時已經發現到唔對路，最後都係分手，之後佢同我講話佢31號真係好唔舍得，但係過左兩日都係發覺個心唔係到。
然後佢話佢父母比佢完左DSE去英國讀書，但係之後個句先令我無奈，佢話佢EX 12月中返左黎整成人身份證個時，EX同佢自己同埋父母傾左去英國讀書啲野，仲話為左慳錢想佢地一齊住，我之後都冇出聲。 到第二日佢同佢EX已經覆合左，佢EX依加返左去英國，而佢就好努力日日溫書，考入去佢EX間大學到讀，之後幾年都同佢生活。

我直到依加真係唔敢相信係事實，我唔係唔信會分手，但係我冇諗過個結局係咁。 分左手我都可以好快回復。但係唔知點解諗起佢好努力為佢個''現任男友'' 個時，我個心好痛。同埋有一種被合謀 攻擊既感覺。如果我當初冇同佢分手，我諗都係做多7-8個月水泡，我已經唔知自己想問乜， 可能只係需要其他人比意見，或者係鬧一鬧我(如果係真有值得鬧既地方，請大大力)
____________________________________________________________________________________
回覆：

其實由一開始熱戀三個月，你話佢EX搵返佢，但竟然偷偷瞞住你見返佢EX......呢度已經好有嫌疑，唔係，係直頭有野啦。佢中意你又點會瞞住你，更何況出街對象係自己個EX？如果佢冇瞞都未必有野，一瞞左就姐係有野唔比得你知啦，我覺得你條女一直一腳踏兩船囉。不過最奇怪係佢屋企人，既然佢又中意EX，佢屋企人都中意佢EX，做乜會變左鬧你？你又傻，一直死唔放手，一直覺得佢冇野。唉不過件事都過左去，佢地個個都有心玩你，你點鬥。