愛情信箱57：男朋友好絕咁分手，但我真係好想復合！ 精選

問題：

你好啊 其實我煩擾左好耐 希望你可以俾啲意見我。

我同男朋友分左手兩個月 我地一齊左一年 分手係我講嘅 但我係一怒之下講 我亦好後悔。

之後兩個星期 佢無再理過我 我求佢唔好分手 佢話佢要好好諗下好好冷靜下 之後佢打大左一大篇文 入面講佢覺得我地兩個價值觀好唔同。例如我成日想佢陪我少同frd 但佢份人又social 而且我份人又好固執 佢有時想我好就講我問題俾我聽 但我就唔聽 仲同佢嘈交 變左佢會每次忍讓 亦唔再講我嘅問題 令佢好攰。而且我成日chur佢管佢 一切一切令佢好攰。個篇文當日佢仲未決定 但我之後就係chur佢希望佢唔好分手挽留佢 結果迫到佢講左分手。
我呢個月日日都好後悔 亦日日都反思左自己嘅問題好多次 希望可以好好咁改變自己。但係因為自己已經中六 而且我日日都同佢同班 分分秒秒都見到佢 所以好容易好唔開心。

我好想追返佢 因為佢真係一個好好嘅男仔 但係我啲朋友個個都叫我唔好再諗住追佢 佢哋話無論點挽回都冇用。我自己都好迷茫 但係個心真係好鍾意佢 佢分手嗰陣話我哋做朋友 對我都好好。即時而家分咗手有咩功課唔明佢都會答我 但係又會適當咁避開我 snapchat都仲會有聯絡 但只係hea send。其實我而家好矛盾 自己心入面好想追返佢 但係知道自己假若特登搵佢一定會影響佢 二嚟只係chur佢嘅另外一種。我有一次特登搵個機會同佢單獨放學 但之後佢同friend講返其實佢只係想做返朋友 而且我啲朋友個個都話佢係一個幾絕情嘅人 覺得兩個人不合就唔會一齊。
但係我真係好想好想追返佢 希望自己可以改變咗自己之後再追番佢 但係聽完啲朋友講 我又覺得我哋嘅可能性其實好微。好多人都叫我放低咗先 但係我咁愛佢我都唔知仲可以點樣放。我自己又無能為力乜都做唔到 做多咗反而會令佢反感。加上大家dse完咗之後 就會更加小聯絡嘅機會。我都唔知自己點樣改變佢先會睇到 因為我哋嘅問題係大部分喺相處上。其實我而家已經明白妥協作出退讓唔固執 但係佢好似根本就唔會再睇到。我唔希望失去佢 因為佢真係一個好好嘅男仔 所以我依家都唔知可以點樣做 希望你可以幫下我啦。
____________________________________________________________________________________

回覆：

我明白你好傷心，不過佢已經決定左，而你又好清楚佢唔中意死纏爛打，所以你冇野可以做架喇。你唯一可以做既野係upgrade自己，比佢睇到你多左朋友、social左，而且份人又開朗左好多，可能到時你再搵佢，佢會重新愛上你呢？呢段時間你做得愈多佢愈反感，不如花多啲時間同朋友一齊，或者專注返喺讀書度，對你同對佢都係最好既處理方式。