愛情信箱04：就像那青春洪水 現在已經不可能追 精選

問題：

你好 我有少少問題想問你架
我同我男朋友散左接近兩年，呢段時間我一直都仲好鍾意佢。我以為係因為同佢同班日日見所以先忘記唔到，但係我考完DSE咁耐，去到依家我居然仲係日日諗起佢，甚至發夢都夢見佢。我呢2年真係過得好辛苦，我唔知應該點做。
佢分手既時候同我講係學業問題，但我知道我地係因為性格不合同埋當時太唔成熟而分手。
好啦其實study leave之後冇見佢好耐所以有少少淡左，但佢竟然事隔兩年冇同我講過生日快樂既情況下突然係0時0分同我講生日快樂，搞到我又開始亂咁諗野啦😭唔知你覺得我應該點做？應該繼續唔搵佢定係主動聊佢傾計？佢無啦啦同我講生日快樂又係咩意思呢？
麻煩曬你😞我真係覺得好煩

_________________________________________________________________________________


回覆：

我覺得你可以試下同佢傾兩句，問下佢依家點，做緊咩，如果佢答你的話甚至可以問佢有冇新女朋友。或者你會唔敢問呢個問題，不過唔排除有呢個機會！假如佢同你講有新女朋友，咁你就可以了左呢個結；假如佢同你講單身緊，仲主動問返你點既話，你就可以繼續同佢講。

不過，兩年後先搵你真係有好多原因，可能係突然間掛住你，但更大可能性係.....佢已經放低左件事，只係純粹想喺你生日祝福一句，或者重新做朋友 (要知道大部分男人面對前度係唔會特別要斷絕關係嗰啲)

但其實你要多啲同朋友一齊玩，填滿時間，盡量唔好比自己諗起佢。而且要嘗試突破自己，做一啲以前未做過既事，例如義工、極限運動、煮野食等等。當自己搵到有價值既野去做，唔根屈喺屋企，自然就會忘記到佢。