愛情信箱02：男朋友比唔到安全感我 精選

問題：

hi你好啊，我係個中學生，同男朋友一齊左一年幾，前排因為公開同唔公開既事分左手。佢係一個異性緣好好既人，身邊既朋友都係女仔多，而且佢地相處既時候有時都親密，可能因為咁，再加上我本身好易無安全感，我成日都會呷佢地醋，一開始成日為呢啲野嗌交，後來都嘗試習慣，放鬆啲唔好因為咁又嬲。雖然事實上我依然好介意，但係我都盡量令自己冷靜。而佢可能係一個唔識唔敢拒絕人既男仔，有幾次女仔靠過去都無推開佢，令到我好心痛，嘈完交之後都有少少好轉。
不過我覺得真係好攰，一直好想佢公開我地既關係，攞返啲安全感，但佢話佢唔鍾意，唔想人地閑言閑語，我一開始真係好鍾意佢，所以等左佢一年一直都無公開除左我啲好朋友知之外。到左最近我地又為類似既事嗌完交之後，佢話佢會試下但係要一步一步唔想即刻公開。聽到之後當然好開心。可惜過左排因為發生左啲野我地拍拖既野意外咁卑另一個人知左，佢好似好嬲咁，總之堅決咁話佢唔鍾意，唔會公開。

我當時梗係灑滿地的很心碎，同佢講，一直以黎我都無乜安全感，所以先堅決想公開，如果佢私底下都可以好似普通情侶咁，病左受傷都主動關心，主動哄下我錫我，同女仔相處既時候唔好咁親密，安全感多啲我都會想就佢，等佢有日真心想公開。不過相信佢唔會做到，都覺得如果真係一路行落去都要公開，點解依家就唔得呢？如果係驚人地閑言閑語，點解唔公開用時間證明卑佢地睇，等佢地無聲出？而且兩個人互相鍾意，點解要理人地既話呢？所以最後我都放棄，提出分手。
其實我想問下你意見，因為我都係到諗其實我真係好鍾意佢，為左呢件事值唔值得咁樣。BTW多謝你花時間聽我傾訴，我講野一舊舊咁唔好介意。

___________________________________________________________________________________

回覆：

你地依家有兩個問題令你失去安全感，我以下會逐個講。

第一，同異性太親密。
首先朋友有男有女，佢有女仔朋友都好正常。如果彼此間普通傾偈當然冇任何問題，但如果佢同啲朋友有過度既身體接觸，例如攬腰、面貼面、撓手呢啲就已經超越左朋友可以做既行為。因為佢冇心，人地可能有意，有時佢覺得冇乜野都唔代表真係冇問題。所以呢個時候佢係應該有避忌，依家你話佢有啲好轉，我諗呢樣唔係你地分開既主因。

第二，唔公開你地關係。
因為你地係中學生，其實公開唔一定係好，有啲老師知道左會棒打鴛鴦，同埋萬一傳去屋企人度，你同佢屋企人接受到嗎？好喇，假設我以上既問題都已經解決左，咁佢唔公開就只有兩個原因。一係佢本身既性格已經係咁，唔鍾意高調，而且好怕醜，呢樣就冇得迫既，真係要一步步黎唔急得；二係佢覺得同你既感情基礎未強到可以公開，意思就係指佢有可能唔想斷自己米路，怕講左出黎會少左女仔同佢玩。

不過想知道佢係咪緊張呢段關係，由你講分手嗰刻已經會知，因為正常佢係會極力挽留你。