點解百變小櫻咁好睇？小狼永遠都會將小櫻放第一位

雖然我係冇追開小櫻既好坦白講，我細個係追開天使愛美麗、小魔女doremi，不過咁耐以黎唔多唔少都有睇過啲啲，同埋近排愛奇藝播新系列動畫版講透明牌，睇完前幾集連載有啲感悟，不得不拎出黎講。

唔知大家記唔記得有集講新卡牌「幻影牌」搗亂，搞到個個朋友變曬做動物，差啲比火燒，呢個時候小櫻驚到唔識比反應。喺千鈞一發之際小狼使出全身力量，衝入幻境裡面放大絕令時間停止，當時佢即刻放低把劍攬緊小櫻：

「唔使擔心 有我喺度！如果驚就深呼吸...」


安慰完小櫻放鬆左好多，內心好溫暖。見到小狼為左自己耗盡咁多魔力，小櫻終於使出真正力量帶大家返去原本世界。

除左今集其實之前有幕都好經典，就係小櫻跌落電梯，小狼聲嘶力竭咁叫左聲：「櫻」，反映喺小狼心目中小櫻地位非常重要。當小櫻平安返黎，小狼更加忍唔住攬住佢。我諗嗰刻小狼一定好想永遠唔放手，等小櫻一世都喺佢懷抱之中，唔會受傷害。

對於小狼黎講，小櫻就係佢既全部：偶爾諗起小櫻既笑容會不自覺咁笑；如果小櫻病左會主動去照顧佢；唔開心又會默默喺佢身邊打氣；特別見到小櫻有危險，個心仲會痛到極點，第一時間用盡所有力量同方法去保護佢...小狼根本覺得自己既生命唔重要，冇諗過自己應該點樣脫身，只係一心放小櫻喺第一位，寧願有事既人係佢都唔好搞小櫻。

男人唔擅長將自己既愛宣之於口，小狼都一樣，平時只係識怕羞面紅，但到左緊急關頭就會拖實小櫻向前衝。對比返現實，個個都中意由自己出發，咩事都會諗左自己先，但如果一個男人真心愛上你，佢會放低尊嚴同自己，變成極之在乎你既感受，想好好保護你既人，唔比你再受任何委屈。例如奶奶唔中意你，佢會同呀媽撐到底，都唔想你唔開心一樣。
所以要睇一個男人係咪愛你，唔係睇佢送幾多禮物，唔係睇佢平時幾搞笑，唔係睇佢帶你去邊度玩...而係你遇到難關嗰陣，佢會選擇放你喺第幾位。