愛情信箱99:向好朋友表白左但佢避開我,我地仲做唔做到朋友?

紙情 兩性專欄 於 27/07/2017 發表 收藏文章
問題:

Hello小編你好啊,之前睇到你嘅ig lovestoryhk話有咩關於感情嘅疑難可以係度問下你嘅意見☺️我有啲關於戀愛同友情嘅問題想問下你,我長話短說啦😂我同一個男仔由幼稚園識到宜家,雖然話識左十幾年,但其實去到中四先開始熟。相處耐左,大家自然會fd左好多,已經有左默契去到左只要我一個眼神佢就知道我惗乜。雖然平日都會嗌下交,但每次都係佢tum返我,同我講對唔住。

日子耐左,慢慢呢份友情由我單方面咁變左質,我一直好小心翼翼咁暗戀左佢兩年。高中三年入面,每次我唔開心,即使我冇講岀黎同人講我冇事,佢都會默默咁安慰我、每次冇人同我食lunch,只要我一搵佢佢都會即刻應承我、佢頹嘅時候又會搵我傾心事。

慢慢我對佢嘅情感越黎越重,我都覺得越黎越辛苦,所以我開始避開佢,大家有一排都冇搵對方,就好似陌生人咁。本身我想係last day嗰陣表白,但因為怕會因表左白就失去左呢位咁好嘅朋友。去到考完dse,呢件事一直煩左我好耐,令到我成日因爲佢而變到好頹好唔開心,所以我決定左要同佢表白。係去grad trip上機前一刻,我係wtsapp send左一大段野俾佢,好可惜佢blue ticks左我。

兩日之後,佢覆左我,只係講左一句sorry。佢同人講話佢唔識面對,唔知可以點覆。收到佢嘅msg之後,我足足渾渾噩噩咁生活左一個月。

直到grad din前一晚,佢同人講話想搵我影相,但又唔敢搵我,怕我會拒絕佢。grad din成晚大家都不停避對方,佢係左面,我就係右面,直到身邊嘅朋友睇唔順眼,拉左我去搵佢影相。影完嗰刻,我行開左好遠喊左,因為我知道呢一次係我最後可以同佢有接觸。我唔知點解佢會見到,仲問我啲朋友我發生咩事,點解會喊。

我真係唔知佢想點樣,當初又係佢一句sorry而了斷左我地嘅友誼,宜家又咁關心我。可能佢由頭到尾都係當我係好兄弟,由頭到尾都係我自己一廂情願。我因為自己嘅自私同佢表左白而失去左段友情感到好愧疚,雖然宜家已經返唔到轉頭,但係我仲想同佢做返朋友,我係咪好傻....我應唔應該wtsapp佢問佢我地依然係朋友啊可....定係好似宜家咁永遠都失去左佢呢位朋友?

Sorry啊,有啲長😂但我真係好希望可以有人答下我應該點做,因為身邊嘅朋友全部都叫我忘記佢。但我又點會忘記到🤦🏻‍♀️
____________________________________________________________________________________

回覆:

其實你真係想做返朋友既,同佢正常、若無其事咁講返野就得,佢唔理你再搵、唔理再搵。不過你要知道佢的確唔中意你,而個心就仲想同你做返朋友,又覺得尷尬或者驚你唔開心,所以先避黎避去。如果你接受到同佢唔中意你呢個事實,你就主動搵佢啦;相反你接受唔到,同佢傾偈會覺得難受,咁你就忘記佢。

同埋如果真係做到朋友,未必可以去返之前咁friend架喇,只係起碼叫做唔會冇曬聯絡先。


如果喜歡我們的文章,請即分享到︰

留言

會員
我要評論
請按此登錄後留言。未成為會員? 立即註冊
快捷鍵:←
快捷鍵:→