愛情信箱03:對方過多負面情緒

紙情 兩性專欄 於 03/08/2016 發表 收藏文章
問題:

你好啊,我而家面對更一個好大嘅難題想聽下你意見!
話說我同男朋友一齊左個幾月,喺一齊之前同佢兜兜轉轉經歷左好多野先終於一齊到,所以我一直好珍惜我地之間嘅關係。
但問題就係佢係一個好負面嘅人,所有我地之間發生過唔開心嘅事,即使係勁少事,佢都會好在意好記上心,繼而就不停自己亂諗鑽牛角尖。
佢好怪責自己成日令我唔開心,覺得自己好失敗,冇能力令我開心。最後佢話因為唔想再承受咁多負面情緒,又覺得我地一齊好似成日會唔開心,咁樣落去冇乜意思,最後同我講分手。
其實我已經唔止一次講過呢啲只係好少事唔洗咁在意,我話左我唔介意會有爭執果啲因為好正常,我亦都同佢講佢都曾經為我帶嚟好多開心回憶
但佢就偏偏好固執,又話自己一直都係個咁負面嘅人,想逃避所有負面情緒。
到底我應該要點做先可以改變佢呢種諗法??我真係好希望同佢一齊解決呢啲問題,同埋帶佢翻正面思想

_________________________________________________________________________________

回覆:

有負面思想既人的確好難處理,因為小編我以前都係一個咁既人,覺得自己比唔到幸福佢,所以成日唔開心同埋自責。之後問題係點解決架呢?就係男朋友係咁鼓勵我,每次情緒一黎到嗰陣就會用身體語言去支持我,例如大力攬住、摸頭、掃背,等我冇咁激動。又或者你都可以得閒整啲DIY禮物比佢,話比佢知佢喺你心目中既地位,同埋明確地表示唔想見到佢咁樣樣。

當然可能有時有啲野你冇在意到,但就係影響緊佢既主因。例如你要留意自己平時既語氣,見到男朋友唔開心同自責嗰陣切勿表現出唔耐煩既口面,否則佢會愈來愈自責,認為自己比唔到幸福你。另外,你對住佢要盡量笑多啲,人既行為、反應係會互相感染,萬一你都係唔開心,咁大家只會累鬥累。

你既角色會比較辛苦,不過如果氹佢多啲,堅持落去,你男朋友都可以同我一樣走出心裡面既黑洞。


留言


請按此登錄後留言。未成為會員? 立即註冊
    快捷鍵:←
    快捷鍵:→