對方覺得冇安全感...好大機會係你做左啲野令佢懷疑

紙情 兩性專欄 於 09/06/2018 發表 收藏文章
有個女讀者呻男朋友狂check佢電話,我問點解會冇啦啦check既?識佢之前唔知?佢話之前冇同男朋友講就同左男性朋友出街,女讀者仲覺得一啲問題都冇,因為佢同個朋友識左好多年唔係嗰味野,所以佢唔明點解男朋友之後咁冇安全感。其實感情係雙方既問題,唔會只係其中一方。女人需要安全感,男人都一樣,突然冇信心唔係無風起浪,一定係你不自覺做左啲野令佢起疑心,依家既例子正正係你呃左佢,佢咪咁囉....


你成日自覺已經做得好好,唔識喺對方角度諗同埋反省自己就有問題。一個人冇可能永遠都係啱,你好可能因為一個冇心既行為或者說話,搞到對方諗多左,疑心愈來愈大。例如明明你係同成班同事去食飯,但就講左句「哦上次同同事呀珊食過呢間...」咁就出事了!呢個時候佢內心肯定無限幻想。冇人中意懷疑自己另一半,因為嗰種感覺真係好痛苦,特別女人敏感啲,少少野已經feel到有問題,更加要叫佢講多啲內心諗法,同時盡量詳細啲解釋每件事,咁就少啲誤會。

甚至你真係曾經傷害過佢的話,佢最後原諒你梗係要時間重新信任你啦。所以如果你唔想佢咁冇安全感就唔好做啲野令佢懷疑!假如最後佢釋懷唔到仲有條刺,唯有分開先係對大家最好。

不過同佢傾完根本唔關你事,係前度或者之前經歷搞到佢咁,咁你就要更加錫佢!我始終覺得一個人成日懷疑你又擔心你總有一日會唔要佢,就證明你喺佢心目中好重要,所以你就抵諗啲做遷就嗰方,對佢好啲一定可以長長久久。

1. 鼓勵佢要對自己有信心
多啲讚佢,少啲提起其他異性,同時要向佢解釋如果係佢自己心魔太大,就算你做幾多野都係會疑神疑鬼。
2. 佢有咩問題盡答,唔好覺得煩
答案最後全部都要表達同一個意思:你心裡面最愛係佢

留言


請按此登錄後留言。未成為會員? 立即註冊
    快捷鍵:←
    快捷鍵:→