女朋友好姊妹講你壞話,只係因為緊張你女朋友

紙情 兩性專欄 於 06/06/2018 發表 收藏文章
之前講左好多次點面對另一半異性閨蜜,其實同性閨蜜既存在一樣有唔少矛盾,我聽過有男讀者同我呻過,話好擔心女朋友既閨蜜會影響佢地感情驚鬧交嗰陣會講自己壞話。其實姊妹情深,除左屋企人同男朋友最親之外,閨蜜就係最清楚你女朋友。有啲野真係閨蜜之間先做得,所以佢地係最可以有福同享、有難同當既人。


1. 好話個個都識講,但真話只有閨蜜先講得出。佢唔會盲目撐你女朋友,為左叫醒你女朋友唔好再錯落去,佢可以毫無掩飾咁話佢,有嗰句講嗰句,但同時佢會陪你女朋友一齊面對個後果:佢喊嗰陣佢比個膊頭佢;佢想呻會犧牲成晚訓覺時間同佢傾偈...總之你女朋友唔開心佢都會第一時間出現,唔會見到佢失意就拋低佢自己一個。

2. 普通朋友之間仲會顧住形象,但係喺閨蜜面前就唔怕比人話,唔怕比人嘲笑,可以做最真嗰面。你女朋友唔化妝既樣、撩鼻屎,各種核突野佢見過曬,仲一啲都唔介意。佢地會喺街度為左打對方而追黎追去;會喺講講下咸濕笑話笑到流眼淚;會突然買機票飛去韓國掃貨...總之就要自由自在做各種瘋狂既事!

3. 佢對你女朋友非常好,唔使驚佢會中意你之後撬牆腳,因為真正既閨蜜係唔會傷害你女朋友,佢兩個唔會計較邊個付出幾多,喺大家心目中彼此都係無可取替既人。你女朋友一個電話話好悶,佢走堂都陪唱k;你女朋友想買生日禮物比你,佢會一齊學整蛋糕之類...所以如果佢要去外國留學、結婚、移民,最唔捨得既人一定係你女朋友,唔好諗住拆解佢地呀。

4. 衣著差唔多、興趣一樣、食既野都好似,感情好到唔會有人講下壞話就破壞到。就算前度換左幾多個,傷心過幾多日子,佢依然喺你女朋友隔離支持佢。依家你女朋友可以接納到你,某程度上佢幫左唔少忙。


佢見過你女朋友最唔開心既樣,知道應該點做先至保護到佢,對你有戒心係驚你對女朋友唔好,去到最後又要痛到撕心裂肺咁返黎。所以最好用行動證明你既真心,唔好比機會你女朋友喊到搵閨蜜求助,唔好搞到你女朋友掛到你心痛。只要你比足安全感 ,令女朋友好幸福咁依賴你,就算少左搵閨蜜,佢地都會安心交最好既朋友比你。

留言


請按此登錄後留言。未成為會員? 立即註冊
    快捷鍵:←
    快捷鍵:→