(｡･ω･)ﾉ 無敵海景伴食爆丼飯 ♥ 一浩Kazuhiro ♥

「相機食先」的分享美食文化，令餐廳創作新餐牌時，更講究造型，不再單單為了填飽肚子而決定食材定位。最火熱的一定是堆滿魚生的爆丼飯。排隊排到媽媽聲都不減人龍！

如果你家住屯門元朗，大可試試這間佔地二萬呎的日本料理，當晚食了幾款食物質素也不錯，而且地方夠大，不用等到明年今日。

爆丼價錢由168起（熟食）至 238（海膽丼），價錢同出面相差不遠，而店內的雞蛋都是用日本仁光園的出品，安心保證。

當日我地係坐吧枱，見到師傅密密手砌爆丼飯，一客飯都用到一盒半嘅海膽，而且啲海膽都係靚仔挺身，唔係溶溶爛爛嘅！我地仲同師傅講笑，日日做可以升職做丼飯達人....

三文魚刺身和風沙律厚切的三文魚刺身，夠肥美啖啖肉，加埋沙律菜及三文魚魚子，捨芝麻醬轉用醋作簡單調味，酸酸甜甜夠開胃。

海膽爆丼實物好大好誇張，大大話話有十幾片海膽舖在飯面，其實係Uncountable，近看完全見唔到白色（飯）！丼飯只用一款海膽--加拿大馬糞海膽，色澤金黄，質感挺身。一睇就知貨真價實的靚海膽！

飯量就真係偏多，建議食量不大的朋友仔兩個人分享，再散點其他食物！難得飯煮得幾好，粒粒渾圓分明，我係食晒全部飯，仲覺得幾好食！馬糞海膽入口即溶，鮮味十足，齒頰留香，沒有腥臭味，真心好滿足！
鐵板燒牛胸膜肉店內設鐵板燒專區，可以坐喺度睇師傅表演。
牛胸膜脂肪比較少，肉質嫩滑又有適當的嚼頭。值得一讚是生熟火喉控制皆好，還留下一抹粉紅，咬下肉汁四濺，加埋海鹽味道更有層次，推介！

烤田樂茄子用了兩款不同的麵鼓醬來調味，把茄子味道甜味提升了，麵豉不會死咸，確實有驚喜！


二萬呎除了吧枱，鐵板燒房，另設酒吧區，食完飯飲杯野都幾唔錯，仲有室外的坐位，可以望到海景，環境真係好舒服！早點到仲可以睇到日落的美景。

我都點左杯Mocktail 嘆下！
我以為係糖水加梳打水，估不到是半個新鮮熱情果汁，呢杯係好有誠意的梳打水。

坦白講，價錢同屯門洪穚排隊店差不多。食完後，我完全想不到為何仲要排隊？
兩萬呎，坐得舒服，兩者已經唔使比較。
一浩Kazuhiro
屯門青山公路1號黃金海岸商場地下R1號舖

For Collaboration and Invitation,
Please send to : littlecatt@gmail.com
FB Page: Kawai / Small Talk Corner
Blogspot。TheZtyle。Beautylife。FanPiece。
BECB＠Beautyexchange。Openrice。
She.com。U lifestyle。Weshare