.｡₀:✿ 沙田遊 ♥ 暢談在居酒屋 ♥ 穴居酒屋 ✿:₀｡

上星期入左去左沙田同朋友去左食飯，
最後揀左新城市廣場下面的穴居酒屋，朋友腳不太好，唔想行太遠嘛！

坐低後店員送上玄米茶，七點幾餐廳開始多人，門口仲有人要等位！

前菜朋友點了燒明太子 $68，
其實我對明太子沒太大好感，覺得好咸，心中只有飲酒的朋友才懂欣賞
不過呢度的燒明太子，切到少少的一件，所以食落都不算好咸，吃下反而有點鮮味，外皮被燒到脆卜卜，口感像吃芝士腸，配合清新爽口的青瓜片，間中會感覺到明太子在口中爆破，真係唔飲酒都覺得好好味！

什錦魚生沙律$79
魚生都幾新鮮，沙律菜用黑醋及少量的芝麻作簡單調味，加左芝麻多左份香口感，感覺都幾fresh!
吞拿魚手卷 $48自從上次食左啡色的大拖，我已經怕了在小店點拖羅，不過見到什錦魚生沙律入面的吞拿魚都幾新鮮，就叫一客試試，吞拿魚挺大件頭，配合微酸的醋飯，簡單但美味，店員仲提醒我們要快快品嚐，為免紫菜變淋！
我們點了燒物，店員先送上三款調味的海鹽，包括抹茶，咖哩，海鹽，當中咖哩味就最強烈，放在一旁也聞到濃郁的咖哩香。

先來燒冬菇 $28，冬菇都幾厚肉，燒完都仲保持到水份，唔會好乾，加左鮮味的木魚絲感覺更香口，我加左少少咖哩鹽，好咸，哈哈！

月見自家製免治雞肉串 $34之前加左咖哩鹽，好咸，今次都係點返雞蛋算啦，雖然係免治雞肉，但外層燒得幾香口，
燒汁味道甜甜地，間中都會咬到軟骨的，口感不錯，加埋雞蛋真係又滑又嫩，正！

蔥吞拿魚腩薄脆 $46初時我以為放錯頁，看圖看名也是前菜吧，來到才知的確是主食，因為薄脆是米通來的，
蔥吞拿魚腩夠碎夠新鮮，加左少量的青檸汁，感覺更加清新，中間加左少量醬汁，所以米通同魚生是分開左，魚生不會令米通有淋晒的感覺，入口都幾脆架！推介
三文魚茶漬飯 $54呢度都有幾款不同的茶漬飯，我揀左三文魚口味的，茶香都幾濃郁，米飯中會夾雜一些玄米粒，所以食的時候會聞到玄米獨有的清香味，而飯粒浸左茶都唔會溶溶爛爛，口感似在吃潮州粥的，因為我不吃爛飯，所以都幾得我歡心就是。

甜品選擇不多，大部分都是來貨的雪葩系列，最後揀左桃雪葩 $68，因為是來貨，不作評論，建議餐廳可以加多少少甜品選擇，有點hea......
整體來說，我都幾喜歡這間餐廳，晚餐價格人均230左右，食物質素都算不錯亦沒大問題，唯一不足，可能是加水太慢，不過也了解飲食業請人的困難。人多自然就會慢少少，對嗎？
穴居酒屋 Yaki ANA
沙田正街18號新城市廣場第1期第1層110舖 2267 0633

For Collaboration and Invitation,
Please send to : littlecatt@gmail.com
FB Page: Kawai / Small Talk Corner
Blogspot。TheZtyle。Beautylife。FanPiece。
BECB＠Beautyexchange。Openrice。
She.com。U lifestyle。Weshare