地道海鮮 Buffet ❤ 香港逸東酒店 Metro Buffet & Grill

本身屋企人都好鐘意食自助餐~~
所以我會經常同佢地去唔同既酒店食 Buffet 架"*


今次就揀左位於佐敦既逸東酒店裡的 Metro Buffet & Grill
因為見到 Openrice 有自助晚餐買一送一或低至 65折既優惠；
而且 3月份做緊【地道鮮風味自助晚餐】, 每位都只係三百幾蚊咋, 即刻打去 book 台啦!!!


一入到去就見到好多海鮮啦~~~
有紐西蘭生蠔, 小龍蝦, 熟大海蝦, 藍青口, 瀨尿蝦, 翡翠螺, 新鮮刺身及壽司等等.....
種類都唔少的喔!!!!


凍盤仲有一系列既健康沙律, 沙律菜既款式幾多下；　仲有煙三文魚, 火腿等前菜~~~


當然第一 Round 梗係食生蠔, 海鮮同埋刺身啦!!!

紐西蘭生蠔雖然較細隻, 味道都正常, 帶有海水味；
翡翠螺都幾新鮮, 特別既係連瀨尿蝦都有呢"*而刺身片都切得幾厚身, 款式及份量都幾多下架~~


話明係【地道海鮮風味】Buffet 點少得香港地道特式煮法既海鮮呢??
當晚我地去食就有避風塘炒青口、辣酒煮花螺、芝士焗紐西蘭生蠔、蒜蓉粉絲蒸扇貝"*
睇見到流口水啦~~~

另外熟食方面仲有印度咖哩~~
當然仲有配咖哩既薄餅同馬鈴薯波波"*
仲比我發現佢地有粥添, 咁凍既天氣食碗粥真係暖笠笠!!!


除左粥之外, 仲有西湯或中湯!!!
個中湯係滋潤既老火湯黎, 真係要飲多幾碗先得~~


D 熱盤海鮮真係好有香港風味丫~~
同我地平時食個D 一樣, 特別係個辣酒煮花螺夠哂麻辣, 正呀!!!個中湯真係好足料, 飲完滋潤返哂"*


佢地仲有主打既燒烤美食, 定時會炮製羊架, 牛肩扒, 雞全翼, 青口等等燒烤食物；
當然唔少得串燒, 烤香腸, 雞腿菇, 粟米, 茄子, 菠蘿等健康素菜!!!
亦可按自己喜好加上醬汁~~

全部都燒得剛剛好, 肉質JUICY 又唔會過燶~~~
個人十分喜歡佢地既羊架, 燒得香口又入味, 而且帶有微微的羊羶味；
不用蘸上醬汁已經好好食啦!!!


另外, 仲有一個麵食區；
有三款麵底選擇, 已經可以揀自己喜歡既才配料及調味!!!
款式唔少架, 感覺非常地道呢~~


最後就係女生們最愛既甜品區啦~~~
甜品款式都好多丫, 有多款cakes, 朱古力噴泉；仲有pancakes, 蛋撻仔同埋麵包布甸等!!!!


仲有仲有令我最興奮既 Movenpick 雪糕~~~
有成十幾款不同口味既雪糕及雪葩, 仲有12款不同配料及即製既脆脆窩夫；　
可以製作個人心意既獨特口味, 仲要任你食呀!!!

Movenpick 雪糕我就最鐘意朱古力口味, 一口氣要食兩球先夠本呀!!!!
另外佢地仲有新鮮熱辣現製既梳乎厘, 真係要睇實佢幾時出爐；
軟棉棉又熱辣辣既梳乎厘, 一定要食丫"*

以三百零蚊既個價錢, 又有咁多海鮮同生蠔, 可以話抵食~而且質素唔差, 甜品多款選擇, 仲有埋 Movenpick 雪糕, 食多幾杯都值回票價"*
記得 print 埋 Coupon 就最抵啦喂!!!

都會自助餐廳 Metro Buffet & Grill
地址：佐敦彌敦道 380號香港逸東酒店大堂樓層 (Lobby)
電話：2710 1901

♥ ~ ♥ ~ ♥ ~ ♥ ~ ♥ ~ ♥ ~ ♥ ~ ♥ ~ ♥ ~ ♥ ~ ♥ ~ ♥ ~ ♥ ~ ♥ ~ ♥ ~ ♥ ~ ♥ ~ ♥ ~ ♥ ~ ♥ ~ ♥ ~ ♥ ~ ♥

歡迎大家跟我聯絡喔~
Email: winniecard@yahoo.com.hk

BeautyExchange．BeautyLife．BlogDB．Blogspot．ELLE．FanPiece．iTrial．Miniwise．
MyCossip．Qooza．QoozaBeauty．she.com．Sina．Style-Tips．theZtyle．UBlog．WeShare

Kami 嘉美 の 貪靚鬼愛分享
Pomote Your Page Too