有時情侶之間會講啲晦氣說話,其實只係一時之氣嬲到無嘢好講,千其唔好當真走去做!

熱豆腐仔 於 21/08/2016 發表 收藏文章

當對方唔開心或者嬲嘅時候,就會開始講假話..連自己都呃埋

「真係唔洗我陪你?」

「唔洗啦..」

「咁我走架啦~」

正當我以為佢講真,想轉身離開之際..

「走啦,我都慣咗一個人」
.

哇!頭先地震呀?!面目全非嘅!

洗唔洗咁晦氣..
.
「咁又唔好,你俾我陪你啦」

「你唔想陪,可以唔洗陪架喎!唔洗咁勉強!」

天文台宣佈發出紅色暴雨警告訊號。

喺局部地區,淨係我地兩個頭頂
.

「我想架..但你自己話唔洗嘅….」

「我話唔洗姐!唔代表真係唔洗!」

吓!咁即係仲要唔要呀?
你想要出聲嘛,我實俾你架喎~
.

ALL IN!

「好啦好啦,我留低啦」

「吓吓都要人發晒脾氣你先明白,依家乜嘢心情都無晒啦!」
.

天文台宣佈改發黑色暴雨警告訊號。
市民應留在安全地方暫避。

係咪呢~係咪呢~走唔切!
唉今次真係濕X晒
.

唉唔X驚!
.

女人講嘢永遠都係咁,尤其是當佢唔開心呀、嬲呀、發脾氣呀,佢地嘅說話你千其唔好當真!
當佢話唔洗,記得要狗衝
當佢話唔好,記得要好

佢話唔洗陪,就老虎蟹都唔好走
佢話唔洗送佢返去,就長腳蟹都要送佢一程
.
.
哈!輕鬆掌握!

但原來…有時又唔係咁..

「我送你返去~」

「唔洗啦咁遠」

又嚟呢招!?今次識玩啦~!

「行啦婆媽!送你一程啦」
「都話唔洗囉!你又話今日攰,早啲返去啦」
.

呀!!!!!!!!!!!!!!!!

不如你送我一程啦!安心上路啦!
.

P.S 重點係,你要識得分幾時係晦氣說話,幾時係真話~!

呢個遊戲,一開始記得叫對方將難易度調低!如果你玩專家級,你成世都分唔清!


ig:hottofuzai
https://www.instagram.com/hottofuzai/

fb: 熱豆腐仔
https://www.facebook.com/hothottofu/

留言


請按此登錄後留言。未成為會員? 立即註冊
    快捷鍵:←
    快捷鍵:→