熟能生巧

妒忌、呷醋並非罕有事。只不過好多人，包括我自己都唔想承認真有其事，同另一半坦白又驚自己留下壞印象俾對方。提到異性戀，明明自己都有異性朋友，間中都傾下計、食下飯咁，但偏偏另一半約異性朋友出街就有啲啲介意咁；明明自命男仔頭性格，不過拍左拖先知自己有典型女仔嘅一面（其實唔應該將某種行為標籤為男仔或女仔會做／唔會做）。

點解會呷醋？老老實實，因為另一半嘅異性朋友有威脅性囉！點解會有威脅性？因為佢外在內在都好出色，因為佢識一啲我自己唔識嘅嘢。加上，唔係個個都咁勇敢去問另一半關於佢哋點識、識左幾耐之類嘅問題。係嘅，我就係其中一份子，局外人或者以為我唔計較太多，但其實我只係懦弱。然後，有時我又會諗，究竟自己有乜嘢比人優勝呢？
但繼續將自己同人比較都唔係辦法，加上喺隱藏妒忌心嘅前題下，呢場假想嘅比賽沒完沒了，體力逐漸被消耗之餘冇人為自己打氣，所以只會越來越辛苦。逃出圈套，還原基本步，人哋都冇話要同你比賽。不過自我增值都係件好事，起碼可以增強自己自信心，多啲欣賞自己。

唔止拍拖，生活上每件事都教緊我哋如何做更好嘅自己。我相信熟能生巧，我希望自己會學識勇敢問多啲。