紋 精選

自從小妹紋左第一次身，就成日碌下IG睇下關於紋身嘅相。而紋完第一個圖案後，一個月後又紋左第二個。
其實我紋第一個圖案，係為左提醒自己「山水非山水、山水般山水」。愛情逃唔過離離合合，離成就左合，合又成就左離。除此之外，紋身係為左令自己知道乜嘢先係真正嘅痛。

有好多情侶都選擇去紋身留念，我相信好多人都覺得咁做好傻。「紋身想洗嘅話好難喎！遲下散左咪後悔囉！」相信呢番說話大家都聽唔少，甚至可能係出自自己把口。但呢幾年似乎開始興cover-up，即係將原有嘅紋身加以修飾，令佢成為新嘅紋身。
同樣地，面對舊情，其實同紋身一樣有唔同方法去進行。Cover-up，將精力投放喺另一樣事上；紋新圖案，提醒自己以後如何處理感情。

而事實上，紋身本來都會甩色。所以即使有人選擇乜方法都唔主動實行，時間依然會沖淡舊情。而一個珍惜紋身嘅人，又會喺若干年後去補色。對一段感情珍而重之，投放心機亦係必然。

下一個出現喺我身上嘅紋身，會係同另一半一齊紋。我希望呢個會係個值得我去補色嘅紋身。我希望他朝一日我哋會去紋戒指落無名指上。（比起買鑽戒，紋身平之餘又唔會跌！）