分手定律:一鼓作氣,再而衰,三而竭。

情情塔塔 於 17/04/2017 發表 收藏文章
小妹有位朋友,佢同條仔拍左拖一年。我諗呢366日入面,佢地嘈左超過700次交。我朋友唔係冇諗過同條仔分手,曾經條仔都有主動提出過,但然後成晚坐左喺我朋友屋企樓下等箍煲,於是咪又一齊返。

條仔本來就癲癲地,拖得越耐咪越癲囉。舉個例,條仔話唔准我朋友見一個異性朋友,9個月後先批准佢咁做。挑!佢真係當左自己法官咁款。Check手機都算碎料,條仔不定時要我朋友匯報行蹤,影相比佢睇以確保我朋友身邊冇任何異性。而近幾個月我朋友間中因為條仔扭佢計,而甩朋友底走去陪條仔。加上條仔依加唔比我朋友同人吐苦水,話因為我朋友講嘅唔會係事實嘅全部。我朋友甚至被要求unfollow哂所有異性朋友instagram accounts。前排我朋友終於忍唔住,問左條仔一句「究竟我欠左你乜野?」。

聽到呢句,我真係心諗做乜L。我同佢講:「欠佢又如何,難道佢可以告你盜竊?」。佢話冇計,條仔話我朋友成日呃佢,所以係欠左佢。根本一日覺得自己欠左條仔,就一日都有罪惡感,分唔到手。老老實實,我朋友點解會呃佢,係因為同中同re-u嗰位異性朋友都在場,我朋友慘在唔記得del whatsapp record,比條仔check到所以就被判9個月冇得見。點解我朋友唔一早同條仔交代清楚?因為當時條仔准我朋友一個月見一次個異性朋友,但同佢講明re-u有異性朋友份又肯定唔批准。而咸豐年前,我朋友話想同異性朋友飲酒(當時我朋友未同條仔拍拖),條仔都可以嬲我朋友。

我朋友真係忍唔住講分手,條仔都同意,但過多一兩日又乜事都冇。因為佢話驚條仔偷拍佢,條仔又威脅佢話擺佢上連登。我真係唔知點幫佢,佢要驚咁多嘢嘅話,除左條仔出軌,佢冇其他辦法可以脫苦海。

分手定律:一鼓作氣,再而衰,三而竭。時間越耐,條仔越癲!我朋友係年頭同條仔去旅行,咁我都信佢冇同條仔扑嘢,但佢話條仔可能癲到偷拍佢換衫咁喎。其實我地咁多位朋友都由佢地拍拖冇耐到依加三番四次勸佢同條仔分手,錯在三個字:唔甘心。點解大家永遠都要kick住喺付出同收穫成正比嘅謬論之上?大佬,你當年考DSE都應該知種瓜得瓜、種豆得豆係呃細路先啱用架啦!

我唔知自己打篇文係幫緊我朋友定令情況更加惡劣。我打呢篇文其中一個目的係:假如有一日條仔真係擺左我朋友上連登,請大家記得我呢篇文,還我朋友一個公道。
標籤: instagram  WhatsApp  分手  連登  分手定律  男朋友  

留言


請按此登錄後留言。未成為會員? 立即註冊
    快捷鍵:←
    快捷鍵:→