講道理嘅媽咪

自寶貝女細個,我就鐘意同佢講道理,有同事問我,小朋友會唔會覺得我囉嗦呢?

講道理 = 囉嗦?

其實都幾唔同架喎!我覺得囉嗦係一啲不斷重複嘅指示,例如:「快啲去沖涼啦,仲唔去?」 我嘅講道理,係解釋點解要咁做,或者點解咁做唔啱,花嘅時間可能比囉嗦更長,不過唔係一個單一嘅指示,背後有好多我想佢明白嘅道理,而且講道理嘅時候,態度溫和,唔可以提高聲調,一提高聲調,感覺就係因為你大聲就要聽你話一樣,例如:「玩完成身汗,不如沖咗涼先,乾乾淨淨先繼續玩咪仲開心!」

有一次我哋想睇一套卡通,爸爸想用電視睇,寶貝女想用電腦睇(我都唔知點解),寶貝女不斷講「睇電腦啦!」仲越講越大聲;我首先同寶貝女講,唔係大聲就啱架喎,跟住就叫佢哋兩個分別講吓佢哋嘅原因,寶貝女話,電腦好啲,個mon唔會太大,爸爸話電視大啲睇得清楚啲,坐喺梳化可以一邊攬住媽咪一邊睇,講到lee度,寶貝女即刻講:「好啦好啦,咁喺電視睇啦!」佢OK之後,我都未放過佢架,我同佢講,用道理比起大聲能夠說服人,希望佢之後同人有不同意見嘅時候,都可以同人講道理。


<管教啊,管教>作者:汪培珽;<怎樣教出好孩子>作者:簡雷瑞怡

lee兩本親子書都好支持lee種講道理教仔方法,有更多更多好理由支持,亦都有好多實用嘅例子,易學易明,係我愛嘅兩本親子書,睇完之後,脾氣都少啲,對個女又溫柔啲。

如果喜歡我們的文章,請即分享到︰

標籤: 道理  親子  囉嗦  

留言


請按此登錄後留言。未成為會員? 立即註冊
    快捷鍵:←
    快捷鍵:→