痴工人姐姐唔痴媽咪？ 精選

小朋友痴工人姐姐唔痴媽咪，相信出現喺不少在職媽咪嘅苦惱排行榜上。生寶貝女之前我同一個朋友講lee個擔憂，佢話小朋友番學老師都會教，媽咪嗲哋得一個，係冇得取替，小朋友就自然會鐘意痴你多啲。真係咁簡單？

都係嗰句啦，lee個世界係冇不勞而獲架，就睇吓你付出幾多。以下幾個係我一直以來堅持嘅原則：

1. 番到屋企，放低工作，做番媽咪

喺公司受老細氣，受客氣，咁又點？做客服嘅經驗話俾我知，收咗工就要放低同忘記，放低情緒，忘記疲累，唔好俾lee啲負面野影響你同屋企人愉快嘅時間。我番到屋企，凡係同個囡有關嘅野我都會自己做番，例如同佢玩、換片、沖涼、換衫、讀故事．．．本身lee啲就係媽咪嘅責任，日頭係工人姐姐做，純粹因為我唔喺屋企，番咗屋企就冇得偷懶架喇！
2. 出街唔同姐姐一齊

出街有冇見過工人姐姐抱小朋友，媽咪同爸爸揹袋？有冇見過酒樓食飯係工人姐姐餵飯，而媽咪爸爸就自在地食緊飯？其實好奇怪，可能係啲姐姐太好，總覺得lee啲係辛苦嘅事就主動話要幫手，唔俾佢幫佢又好似冇野做，所以，就當我係一個絕情嘅僱主啦，我真係好少同姐姐一齊出街，我寧願自己抱，自己一袋二袋咁出街，我都想自己做番晒媽咪應該做嘅野，更何況星期一至五要番工，親子時間已經少，星期六出街仲要帶埋工人姐姐，我真係唔制呀！

3. 培養溫馨小習慣

番工之前，我都會要求同寶貝女攬攬同goodbye kiss，瞓覺之前又要一個good night kiss，我好想透過lee啲小動作去話俾寶貝女知，我真係好愛佢，慢慢佢就會感受到，而佢亦都會同類似嘅方法表達佢對你嘅愛，真係sweet到暈架！
其實講到尾，可能只係我想痴住個女多啲！哇哈哈哈哈．．．．．