《我用GPS追蹤男友II》：（一） 精選 推薦

其實時間長咗，咩都可以習慣：習慣一個人、習慣身邊多個人、甚至習慣身邊嗰個人有另一個人……無咩值得大驚小怪。
不過如果我一早知道頭先嘅入伙派對，原來會係我哋四人幫最後一次開開心心坐低食飯嘅話，或者我會選擇繼續忍，忍到所有嘢變成習慣，而唔去開始呢個惡夢。

可惜而家已經太遲……有啲念頭一旦萌生，就唔可以再扮若無其事。

我決定咗喇。


「你幫我。」

如果可以，我唔會想動用我哋咁多年嘅友情做籌碼。尤其係我估軒仔對我嘅，唔止係友情咁簡單……但，佢係我唯一嘅希望。
「Cat，你知我唔會唔幫你。但係……咁做好似過火咗喎。」話晒阿聲都係佢老死，叫佢幫阿嫂對付兄弟，罪名應該比勾二嫂更不可寬恕。

「我過火？咁佢一次又一次呃我就唔過火喇咩？ 你幫我喺佢電話裝嗰個app，起碼我會有證據同阿聲對質丫！」

我都唔係好明自己點解容忍得到咁嘅生活……日復日，我就係處於懷疑佢、處於說服自己唔係咁、然後再繼續懷疑佢嘅惡性循環。只有人間煉獄，先至要人咁樣重覆死前最痛苦嘅事，直到永遠。

「你肯定阿聲同珊珊有嘢？」我知軒仔唔會信，大家係識咗咁多年嘅老死，點會搞我男朋友。正如我頭先食飯唔覺意睄到姍姍部電話嗰陣，一樣覺得晴天霹靂。
「咁個WiFi呢，點解釋？」


軒仔無再出聲。我知道佢嘅沉默，係代表應承做幫兇 —— 第一仗，勝。


＊＊＊＊＊＊＊＊＊＊＊＊

「返嚟喇？又話無帶洗面奶過嚟要去買嘅？」有心理學家話，其實一個人平均每日都會講廿五次大話，話落街買嘢但去咗送軒仔搭車，就係其中之一。

「無我平時用開嗰隻呀，我聽晚返屋企先拎。順便第二朝搬埋部榨汁機過嚟嘛，你上次又唔肯幫我搬。」

「阿媽話未拜四角唔入得嚟嘛，我嗰幾次幫送床、整WiFi嘅人開完門就即刻走喇。」乜係咩？咁又點解釋頭先入伙派對打邊爐，連我都未開口問佢個密碼係乜，姍姍部手機就已經自動連咗我哋屋企個WiFi？
未拜四角忌搬嘢，咁就宜密會？

呢句可能係佢廿五個大話之中嘅第三十九個。


呢個時候，阿聲部電話震咗一下，我瞄一瞄，又係姍姍嘅Snapchat。今日先被同事笑完我好out，話有咩可能未聽過Snapchat呢個偷情聖app，因為呢個app嘅對話紀錄喺指定時間之內就會自動消失，完全無仇報。我花咗成個鐘頭嚟摸熟點用，例如學識咗，如果我而家偷偷哋撳入去珊珊個Snapchat，阿聲就以後都唔會再睇得返。

我望住嗰堆疊到成呎高嘅碗碗碟碟，再望一望自動請纓洗碗嘅阿聲……原來好多時，改變一生嘅決定，往往就係得幾秒時間考慮。

好機會！
我擰轉背拎起阿聲部電話，隻手震住咁解鎖。嗰幾秒鐘，我覺得自己好似迷失咗個黑洞入面，感覺唔到時間過咗幾耐，或者根本有無流動過 ……


手機螢幕上面張相，係一套全黑色絲質性感內衣，上面寫住幾個比警告標語更加震撼嘅字眼：「呢個款你鍾唔鍾意 <3 」？


（待續）

***********************

B612專頁：http://www.facebook.com/b612lpp


【B612按：只連載四集！希望大家share吓啦！怕miss咗追故嘅記得like埋我個FB page呀！:)】