千祈唔好玩塔羅牌，因為…… 精選

如同邊一個發明了返工。我一直都好唔明白，到底係邊個發明紫微斗數、算命睇相、塔羅牌之類嘅嘢。
占卜呢家嘢係無得輸嘅。收你幾舊水，答幾條問題：「今年一二月、七八月、十一二月都有機會發展喎，睇你識唔識把握啦！」完全係無位入，因為點都一定啱。



其實，我唔係想話啲風水佬、占卜師會呃你十年八年。相反，我係因為覺得算命太準，先以後唔敢再玩。

第一次去玩塔羅牌，係同我前度去嘅。嗰時感情有啲暗湧，有晚食完飯經過廟街，我提議一齊去玩占卜。我好清楚，自己其實係想借怪力亂神說服佢。話唔定會算到我係佢真命天子，而佢又真係信呢？幾大就幾大啦。
結果，阿廟街玲姐，竟然當住我面同我前度講：「而家同你糾纏緊嗰兩個都唔係喎，你兩個都唔好揀啦。」喂！咁即係play鳩me姐！話晒都係我出錢占卜，你而家咁樣兜口兜面hurt我天理何在呀？



跟住輪到我。最精彩嘅係，佢，竟然，話，我嘅感情，係好坎坷曲折，唔到38歲都唔洗旨意會穩定落嚟。38歲……38歲呀！

到底有咩仆街得過，你明明已經覺得自己都被個天玩夠喇啩，浮浮沉沉咗七、八年，咩嘢感情挫折都經歷過晒，好想安定落嚟，然後佢話俾你聽 —— 唔好意思，其實，你條命係要衰多十年先可以修成正果。


當時嘅我，係決定唔信佢講嘅嘢。有一個理論叫做「自我應驗預言（self－fulfilling prophecy）」，大概係話自己一個人對事情嘅期望，係會影響到事情嘅發展。有人同你講你一定唔會升職做到腦細架喇，所以你都覺得自己唔會，無謂嘥心機捱眼瞓直接放pea，最後當然真係做唔到啦。問題係，到底係你本身真係唔得，定係因為佢咁講完先唔得？如果無人咁同你講過，會唔會喺另一個平行時空，其實你係做到架呢？

唉我唔理，總之嗰時，我好努力修補同前度嘅關係，都過咗一兩年蜜月期架，我仲大膽到同佢求婚，一切都好似漸入佳境咁。而下場好明顯啦，佢咪就係做咗我前度囉。

同佢分手之後，我又拍咗陣散拖，然後遇到而家呢個女朋友。距離38歲大限，仲有好Q咁多年，但係，我已經好想同佢步入人生另一個階段，一齊生活。
而且，我好想打破「38歲」呢個詛咒。



有啲嘢，見過鬼就自然怕黑。我唔係好敢俾壓力我女朋友，但時不時都會提起，不如搬出嚟一齊住，好過大家晚晚OT到天昏地暗，好日都唔見一次。

咩都準備好晒，地方搵咗，傢俬都諗埋，只欠東風。我甚至已經幻想到，我哋每個weekend去超市買餸返屋企煮飯嘅畫面。

前晚，繼我哋連續OT咗八日無見之後，臨收工，我收到女朋友嘅訊息：「James，對唔住……我諗過，我而家真係無精神力氣去照顧另一個人，又或者去迎接新嘅生活。可能係我哋認識嘅timing唔夠好，我做唔到。對唔住。」


果然。我就知道個天對我無咁好死架喇。到底當日幫我占卜嘅係玲姐定霞姨，準定唔準，我真係唔知。不過計一計……嗯，仲有八年零三個月又十七日，38歲其實都好快到姐……


************************************

網絡作家B612 – Facebook專頁：b612lpp

（鍾意睇嘅請你去俾個like，支持吓我繼續寫嘢吖！:)）

「倘若有一個人對一朵花情有獨鍾，而那朵花在浩瀚的星河中，僅此一朵。那麼，他只要仰望繁星點點，就心滿意足了。於是他喃喃自語：『我的花就在星河的某個角落』可是，這花一旦被羊吃掉了，瞬間，所有星星也將隨之黯淡無光。那你也認為這不重要嗎？」