其實鎖完Brian個電話落櫃桶唔夠兩秒，我就已經後悔。區區一個鎖，鎖得住個電話，咁Brian呢？佢有心要背叛我嘅，行落街用電話亭打一樣得，用咩途徑根本唔重要。
而鎖電話呢個舉動，真係諗返起都一額汗。咁樣根本係賭緊自己喺Brian心目中嘅地位，買重自己贏，否則咁做就等於將Brian推咗佢去個女人嗰一邊。
呢晚，我完全瞓唔到。唔止係因為我對Brian好失望，而係我對自己都好失望。唔夠一個月之前，我仲係一個好有理性、好尊重另一半私人空間嘅人。
但而家呢？我係一個痴線到會鎖起自己男朋友電話嘅癲女人呀！
＊＊＊＊＊＊＊＊＊＊＊＊
「俾返部電話你，Sorry。」
「你無對我唔住，唔洗講sorry。部電話我唔帶去歐洲喇，反正嗰邊治安又唔係好，我哋兩個人用一部就夠啦好無？」我知無論做幾多嘢都好，都好難彌補對Becky造成嘅傷害，但我希望呢步係第一步。
而且Rachel嗰邊應該無問題嘅。反正上個星期我已經同佢講咗，想用兩個禮拜時間諗清楚，暫時唔好聯絡。
就算Becky唔原諒我，起碼都未至於一鋪清袋。
＊＊＊＊＊＊＊＊＊＊＊＊
成個旅行，我都覺得好難放鬆。每次我哋好開心咁去玩，或者見到靚景好興奮，我都會諗，唔知Brian最想分享呢一刻嘅人係咪我……入親鋪頭睇嘢，下意識又會懷疑唔知佢係咪想買俾第二個女人。
終於嚟到旅程嘅最後一晚， 心情好緊張。Brian原來訂咗位，同我上遊艇食燭光晚餐，可以邊食邊望住布拉格查理橋嘅夜景。
「Sorry……我知我之前係心野，但係，我好想以後可以同你周圍去旅行，睇每一到嘅風景。信多我一次得唔得？」
「……嗯。」我唔係好識反應，係有啲感動，但又唔敢百分百信佢，只可以輕輕點一下頭。
我以為，同Brian獨處咗十四日，無任何人嘅騷擾，可以令佢諗清楚自己想要乜嘢。我真係以為，佢已經揀定咗。
臨瞓之前，我喺Facebook post咗呢張相，寫住：Last stop of our journey :) ……估唔到最後，一語成讖。
飛機降落嗰一刻我好緊張。除咗係因為一向好怕嗰種離心力，仲好怕著地之後，我嘅世界到底會變成點樣。
但，就係咩事都無。
我同Brian由機場返到屋企，一切都好平常。之後每日返工放工，煮飯洗衫，weekend去行吓山游吓水，Brian幾乎每一日都同我一齊……所有嘢都無唔同，除咗Brian比以前更加錫我。佢間唔中放工會買紮花送俾我，每一晚臨瞓會好誠懇咁望住我講「我愛你」，得閒主動幫我按摩吓肩頸，出街時不時攬實我條腰。
我無再嘗試check Brian手機，因為我覺得如果我對佢唔信任，間接都會影響到呢段關係，從而改寫結局。至於而家，我幾乎可以用「我們從此幸福快樂地生活下去」作結。幾乎。
呢半年以嚟，我都唔敢出席任何Brian朋友嘅聚會，但今晚破例同佢哋去咗唱K。唔知係咪因為太耐無見所以生疏，我總係覺得佢班朋友對住我有啲怪怪地，又或者只係我凝住凝住……之前唔想見佢哋，就係好怕大家望住我嘅眼神，好似在場每一個人都知道Brian出去偷食嘅事蹟，得我一個被蒙在鼓裡做傻仔咁，無地自容嘅感覺。
K房雖然好黑，人喺呢個環境下意識都會放鬆落嚟，但反而令我對所有細節更加敏感。我留意到Brian今晚好頻密咁用手機。或者佢唔為意，但我同佢隔幾個身位，都睇得出佢嘅表情有一絲愜意。
心血來潮，我決定用經痛做理由，早一步離開K房，留低Brian繼續同佢班兄弟慶祝生日。
返到屋企，我第一時間打開電腦。唔知點解，我有個預感，今次，會係最後一著。我打開自己部電腦，用上年去旅行Brian借過我部電腦遙距登入佢部電腦嘅設定，逐個文件夾打開睇吓佢嘅file。
Brian嘅所有嘢都好一絲不苟，電腦file都唔例外，全部都整齊分類好：Work、Family、Travel、Movie咁，用年份標好晒。唯獨係有一個子文件夾，零零舍舍放咗喺佢所有銀行月結單留底嘅文件夾入面，格格不入咁叫做「photos from mar to oct」。
呢個文件夾唔單止出現嘅分類位置奇怪，而且個名仲唔跟佢一向習慣，無分大細草，亦無標年月日。
如果呢個文件夾嘅名係由我改，我會揀：「潘朵拉的盒子」。至少咁樣可以俾我一個最後警告：千祈，千祈，唔好打開。
我click入去，逐張相睇。當我見到兩位主角出現喺唔同嘅相片背景，例如餐廳、沙灘、睡房，又或者係連同我都無去過嘅迪士尼、澳門……我嘅心境一路都好平靜。哥倫布發現新大陸或者會興奮幾日，但再有第二次、第三次，然後變成家常便飯，成件事就變得乏善足陳。
或者我係有少少唔甘心。原來人與人之間嘅關係就好似沙堡壘咁，你以為好堅固，其實都係以片面隻語建造，隨時都可以好似911咁整座倒塌。大話，唔止講一次，而係可以一直重複，直到永遠。
呢一晚，我覺得好似連上帝都缺席。
我將嗰堆佢兩個挨得好埋、拖手、咩都有嘅相，重睇又重睇咗幾次……跟住隨手攞起張memo紙，將每張相嘅日子逐一抄低。佢哋一齊嘅每一分鐘，都代表住一個選擇。每一分鐘，Brian都可以選擇繼續或者回頭……但佢無。
我將張memo紙夾咗喺佢掛鎖匙嘅記事板上面，然後 —— 收拾細軟，決心離開呢個曾經以為算係一個家嘅屋企。
因為我明白到，我要防嘅根本唔係咩其他女人、狂蜂浪蝶，而係呢個，唔會一心一意對我嘅男人。
（完）
【B612按：終於大結局！第一次試寫連載，反應都算唔錯，多謝輔仁肯登，同埋多謝大家支持呀。有咩意思／想分享吓都可以留言或者inbox我！至於呢個故事係真係假就……算啦不要問了，總之我的朋友不是我啦。下次會試吓寫其他題材，記得like我個page追故呀！:)】
************************************
網絡作家B612 – Facebook專頁：b612lpp
（鍾意睇嘅請你去俾個like，支持吓我繼續寫嘢吖！:)）
「倘若有一個人對一朵花情有獨鍾，而那朵花在浩瀚的星河中，僅此一朵。那麼，他只要仰望繁星點點，就心滿意足了。於是他喃喃自語：『我的花就在星河的某個角落』可是，這花一旦被羊吃掉了，瞬間，所有星星也將隨之黯淡無光。那你也認為這不重要嗎？」
請按此登錄後留言。未成為會員? 立即註冊