偷食的人有難了:我用GPS追蹤男友(二)


(第一集傳送門:http://goo.gl/Dal6U3)
自從我開始利用電話追蹤Brian,我同佢嘅生活幾乎無任何變化,除咗每日返工放工、同朋友食飯,我都會借啲二問佢喺邊,然後用個app睇吓佢係咪真係喺佢所講嘅地方。

每一晚佢沖涼,我就好似做賊咁,把握時間check佢手機 。但每一次,都捉唔到有咩「景轟」。Whatsapp無,通話紀錄都無 。

佢部手機,忽然成為我嘅另類毒癮。我好想知道唔喺我身邊嘅佢,究竟會變成一個咩人。


今晚Brian又話約咗人去九龍灣食飯。我照樣打開個app一睇,佢嘅定位係黃大仙,而唔係九龍灣。

「食完飯會唔會直落?幾點返嚟?」扮到若無其事咁,好似已經變成我嘅強項。

「我放咗佢哋飛機呀。阿媽打嚟話個洗衣機壞咗,我返緊屋企幫佢睇吓。如果搞掂太夜嘅今晚可能唔返喇,你瞓先啦B。」Brian係咪對住每個女仔都叫佢做阿B架呢?

隔多半個鐘再打開個app, 佢真係返咗屋企。

唔通係我諗多咗?

************

「你今晚唔返屋企瞓,唔怕女朋友知道咩?」

「唔洗驚,我有辦法。 」其實成句嘢無咩真話成份 —— 我唔係唔驚,亦只係因為無辦法先至咁做。



上次Becky早咗返屋企,我喺廁所出嚟,睄到部電話就咁放咗喺梳化,嚇到連個心都跳埋出嚟。雖然我唔信佢會知道密碼,但穩陣起見,都係連撳兩下home掣,check吓最近開過咩app。

最近一個app係“Find My Friends”。係咩嚟架?我從來都無用過。打開佢,畫面係一個地圖定位,顯示屋企地址,而下面係……「咩話?Becky追蹤緊我嘅位置?咩意思?」

睇埋Whatsapp,今次仆街了……原來Rachel send咗句「I miss you, B.」過嚟 。我明明叫咗佢夜晚唔好text我架嘛!咁Becky仲發現咗啲咩呢?

但佢頭先個樣又唔似好嬲……點解會咁嘅?


Rachel係無錯幾靚,尤其係佢把聲,講嘢好溫柔,陰聲細氣咁。次次聽到佢嗲我,配合埋水汪汪嘅雙眼,我都一定無力招架,即刻全身酥軟,覺得頭皮發麻……不過我心入面知道,同咗Becky一齊咁耐,佢先係最了解我、同我最夾嘅人。

之前咁多次都無事,呢鋪一定唔可以衰。


第二日返工我上網查過,呢個仆街app可謂Apple一大爛發明。不論係移除呢個邀請定係關閉分享,都會俾Becky發現我知道咗。諗咗好耐,唯一嘅辦法係:唔好帶部電話喺身。

所以,啱啱我同Rachel上酒店之前,已經放低咗部電話喺屋企。

呢個世界就係咁,道高一尺,魔高一丈。


只係,有時你以為自己係魔,但其實高人一丈嗰個,未必係你。

************

距離我上次發現Brian同Rachel text,已經過咗兩個禮拜。但呢段時間,就算我日日用手機追蹤Brian嘅位置,都係無發現到啲咩。

把心一橫,我決定再check多次佢嘅手機。「凡有接觸,必有痕跡」 —— 點可能一啲證據都無留低?


查手機嘅工序其實每次都一樣:解鎖、睇Whatsapp、通話紀錄,然後快手收埋個電話。但今次,我專登揀Brian瞓咗覺,摸黑偷雞起身,時間就可以長啲。

我唔信佢哋會突然斷絕聯絡。望住個home screen, 我不斷諗究竟仲有咩可以check,邊到會留低蛛絲馬跡。然後靈機一觸,打開phone app,輸入Rachel嘅電話。


顯示出嚟嘅名,竟然係叫「Rex」。

連名都改埋,高招。咁亦代表Brian有可能已經知道我check過佢手機。所以呢一次,我一定要搵到證據。

但電話嚟嚟去去都係得嗰幾個app,仲有咩可以check呢?

有!Safari瀏覽歷程!


打開Safari,一路掃落去,都係啲好普通查吓Google、Wiki嘅紀錄。


差唔多到最底,俾我見到一個Google搜尋,「新金莎酒店」,日子就係上個禮拜Brian話返屋企食飯嗰晚。

就算我無爆開房,睇得多潮文都無可能唔知呢間係時鐘酒店。我打開Google Maps,果然有「新金莎」嘅搜尋紀錄。我不能不感嘆,有時科技嘅進步,真係有能力摧毀好多嘢。


好衰唔衰……突然間,我部手機響咗一聲。我見住Brian由靜止,跟住郁咗幾吓,爭啲就心臟病發。

時間太短,我趕唔切俾任何反應。Brian一擰轉身,就見到我拎住佢部電話……


(待續)

【B612按:第一次試寫連載。呢個故唔會太長架咋,預計四集,希望大家俾個面share吓啦!怕miss咗下一集嘅記得like埋我個page呀!:)】

(第一集傳送門:http://goo.gl/Dal6U3)

************************************

網絡作家B612 – Facebook專頁:b612lpp

(鍾意睇嘅請你去俾個like,支持吓我繼續寫嘢吖!:))

「倘若有一個人對一朵花情有獨鍾,而那朵花在浩瀚的星河中,僅此一朵。那麼,他只要仰望繁星點點,就心滿意足了。於是他喃喃自語:『我的花就在星河的某個角落』可是,這花一旦被羊吃掉了,瞬間,所有星星也將隨之黯淡無光。那你也認為這不重要嗎?」

標籤: GPS  GPS追蹤男友  女朋友  男朋友  港女  失戀  分手  偷食  第三者  

留言


請按此登錄後留言。未成為會員? 立即註冊
    快捷鍵:←
    快捷鍵:→