一直以為，自己都算係一個合格嘅女朋友，唔發脾氣，唔會痴身，唔買名牌。
而且，我從來唔係一個多疑嘅女人。
之前兩個男朋友，都唔會介意俾我知手機、電腦、Facebook呀嘅密碼。正正係因為咁，我從來都無乜動機要去睇男朋友嘅嘢。畢竟大家都有秘密，大家都有前度，無謂互揭瘡疤。
但唯獨是Brian，從來都唔會主動講密碼俾我聽，就連喺我面前解鎖手機都會遮遮掩掩。唔係身有屎嘅，怕咩俾人知？佢越係神神秘秘，我就越覺得佢想要嘅，唔止係私隱咁簡單。
果然，一齊咗未夠兩年，就發生咗一連串令我哋無辦法繼續一齊嘅事……
如果，所有嘢可以重新嚟過，我會告誡所有人：「無論熱戀中失戀中 都永遠記住第一誡 —— 別 要 張 開 雙 眼 。」
＊＊＊＊＊＊＊＊＊＊＊＊
女人，通常有種不可救藥嘅浪漫幻想，就係幾乎遇到每個男人都會覺得佢係白馬王子、係真愛。但我唔同。Brian對我嚟講，係有一種無可抗拒嘅魅力。不過咁多年嚟，佢係第一個令我有遇上「對的人」嘅感覺。
一齊無耐，我已經同Brian搬咗出嚟一齊住。我唔想要以前嗰種一星期食兩次飯嘅戀愛。每一分鐘可以同佢相處嘅時間，我都唔會浪費，返工唔想OT，朋友最好一次過見晒。
一直以嚟，我哋喺生活上都好合拍，要幾痴纏有幾痴纏，同時又好尊重對方嘅私人空間。我哋屋企有兩張書台，分別佔據兩個角落，算係小小蝸居之中各自嘅私人空間，不可逾越。大家都好清楚，橡筋拉得太緊，只會更快斷。
兩口子，連同居生活都無咩磨擦。繼續行落去，似乎好合理。
Brian係個好有交帶嘅人，平時唔多去夜街。有一晚，我同朋友食完飯，無直落下場就返咗屋企。入到屋，佢仲沖緊涼，我攤咗喺梳化諗住睇電視。突然間電話響，但望一望手機又無任何通知。
順住光線一睇，原來係Brian嘅，佢部手機攝咗喺梳化側邊條罅。按佢一成不變嘅生活習慣，應該會放部電話喺書台叉電先啱架？
我順手拎返佢部電話出嚟放喺茶几。但就係呢一吓，竟然俾我見到鎖屏有個Whatsapp訊息嘅預覽：
「I miss you, B.」 係一個叫Rachel嘅人send嚟嘅。
另一半偷食，其實同有絕症係差唔多，就係事前從來無諗過，發生嘅時候死都唔會信，但最後，點都要認命。
成個訊息只不過得一句，但我足足望住個螢幕我諗有十秒，都好似仲係理解唔到呢四個字背後代表嘅意義。又或者係，我諗唔到除咗Brian有第二個之外，呢幾個字仲可以代表啲咩。
拎住部手機，我感覺到自己腎上腺素霎時急升，心跳加速，呼吸越來越重。
「唔會嘅，我同Brian已經諗好咗下年年尾結婚，佢無可能臨結婚先入花叢嘅。」
但另一邊廂，我嘅理智馬上跑出嚟反駁自己：呢個世界只有「無可能」係無可能。
廁所嘅水聲突然停咗，將我帶返返嚟現實。我知道，分零鐘之後Brian就會出嚟，得返好少時間。
呢一刻，我個腦有一百個念頭閃過，以媲美電腦嘅速度進行咗好多運算：會唔會仲有其他合理解釋？不如拎部電話質問佢？定係扮無事試佢？手機入面仲有無其他嘢？
嗯，解鎖。
生日日期？唔啱。紀念日？唔啱。無時間喇，試埋呢個：門牌號碼。
居然，咁都俾我撞啱咗。
即刻打開Whatsapp，佢同嗰個Rachel嘅對話只係得嗰一句，無上文下理。睇嚟Brian早有防備，刪晒之前所有嘅對話紀錄。
斷咗線索，而佢隨時都會出嚟。我可以點做？唔通拎住部電話都無佢符咩？
……冷靜啲，深呼吸。
跟住落嚟嗰幾十秒，我做咗樣而家諗返轉頭都覺得令人心寒嘅事。然後放返低個電話，若無其事咁等Brian出嚟。
＊＊＊＊＊＊＊＊＊＊＊＊
「咦？你唔係去飲嘢咩？」Brian打開門，眼神好凌厲咁掃過我同梳化上面嘅手機。
「諗諗吓就嚟M到唔係好想飲酒，咪早啲返嚟囉。」我邊講邊用遙控器轉台，唔敢抬頭望佢。「到我沖涼喇。」
企起身嗰一吓，感覺有啲似坐咗好耐船終於有得上岸，腳步飄飄踩落平地，好似仲浮吓浮吓咁。一閂埋廁所門，我成個人軟晒挨咗埋牆 。諗返頭先嗰三分鐘所發生嘅事，仲係覺得好唔真實。
不過三分鐘前，我嘅世界仲係一啲瑕玼都無，連空氣都係甜嘅。但而家， 故事一切都已經被改寫。
原來，自己係可以咁恐怖嘅……
頭先電光火石之間，我撳入去記低咗Rachel嘅電話，然後用iPhone “Find My Friends”個app，用Brian部手機向自己送出定位邀請。
換句話說，由而家開始，無論Brian去到邊，我都可以知道佢嘅行蹤。佢部iPhone，已經變成我嘅專用追蹤器，而且神不知，鬼不覺。
（待續）
【B612按：第一次試寫連載。呢個故唔會太長架咋，預計四集，希望大家俾個面share吓啦！怕miss咗下一集嘅記得like埋我個page呀！:)】
************************************
網絡作家b612 – facebook專頁：b612lpp
（鍾意睇嘅請你去俾個like，支持吓我繼續寫嘢吖！:)）
「倘若有一個人對一朵花情有獨鍾，而那朵花在浩瀚的星河中，僅此一朵。那麼，他只要仰望繁星點點，就心滿意足了。於是他喃喃自語：『我的花就在星河的某個角落』可是，這花一旦被羊吃掉了，瞬間，所有星星也將隨之黯淡無光。那你也認為這不重要嗎？」
請按此登錄後留言。未成為會員? 立即註冊