【純粹。講】 怪獸家長進化篇:搵醫生寫健康紀錄唔係買菜搭棵蔥

麵語錄 by min 於 04/12/2016 發表 收藏文章
話說尋晚喺多花生嘅將軍澳區Facebook群組出現嘅一篇網上公審,係關於一對孖B嘅媽媽—梁太,為咗一封幼稚園入學健康報告而前後去咗兩次診所嘅經過,梁太表示喺第二次見醫生,喺醫生檢查嘅時侯整到其中一位小朋友條頸紅晒,梁太同醫生經過理論之後決定報警,由於梁太趕時間所以落完口供就拎返學校封信走咗。

原文(圖):我尋晚帶孖b去睇醫生諗住順便問埋可唔可以寫幼稚園既health record,但佢收費話另計,仲要話二百幾海鮮價,感覺不安,就話唔洗。
今朝發現唔夠時間搵第二間醫生寫,所以照去啦,點知話要收多次診金,擺明搶,都算喇,照睇。
一入到去,醫生話「又寫喇」好串既態度。佢之後塞晒全隻手入細孖件衫,好粗魯(尋晚只塞聽筒),結果勒到細孖條頸紅晒,我覺得好唔對路,已經叫爸爸解開多幾粒鈕,佢就叫姑娘入黎睇,聽左好耐都未聽完,感覺開始玩野,我話醫生你已經搞到大孖條頸紅晒,姑娘你都睇到,佢就話我哋唔可以繼續檢查,因為冇左信任,我話姑娘你都睇到醫生勒到佢條頸紅晒,醫生話報警囉!
佢拎我bb黎出氣,整襯佢,sorry都冇句,我唯有報警,我即時影返紅左既位置。等警察黎期間,我叫老公帶bb佢哋去隔離醫生度睇,我等住先,佢即刻拍台收起我哋份幼稚園既信,嚇到我哋bb即刻喊,仲話我要挾佢,佢好驚,唔比我哋走。我開左門先,費事有咩事冇人証。
警察都到喇,我講完晒之後,警察知我哋趕時間,叫我哋走先,我去拎返封信,佢又拍台,又嚇到我哋bb喊,話佢未講唔會比返封信我哋,警察問有咩理據,語無倫次講左啲費話,警察就話你想講野,等人哋走左,慢慢同佢講,先死死地氣比返份信我哋。
之後警察留低同佢傾。
後黎警察打返比我都話佢好串。
呢個醫生叫黃家豪,男,駐日出康城盈健。
覺得我再返去睇,想玩我,都唔好拎小朋友黎玩囉,好冇醫德,好冇品!
第一次報警,唔係掂到小朋友呢條底線,都唔會咁嬲。

首先講明筆者未有小朋友,的確難以明白媽媽對親生孩子嘅緊張可以放到幾大,當然媽媽保護小朋友係無錯嘅,有任何人傷害小朋友(甚至家人)都會「粉身碎骨」出嚟檔!
既然梁太將事件公開,首先目的當然想同區內媽媽同街坊講出醫生嘅惡行,「惡行」就唔再重覆喇~就如梁太嘅帖文已經表明,筆者就以普通人點樣睇一個咁嘅媽媽。

梁太嘅小朋友據說被整到條頸紅晒,梁太喺原帖並無貼出所謂「證據」,經過多位網友嘅查詢後就喺回應貼出相片(圖),齋睇相「受傷」位置並唔係頸,以紅印形狀估計係醫生聽診時按住小朋友膊頭而成。每個人嘅膚質同細胞結構唔同,筆者自己就係容易有瘀傷,詳情可以Google"易瘀青體質",而且相信好多人都了解小朋友肌膚好嫩滑,所以筆者好認同一位媽媽網友回應:有時大力D抹咀都會紅。其實大人去睇醫生嘅時侯,醫生聽診都會按住病人膊頭借力(因為聽筒要緊貼身體先聽得清楚),如果小朋友係有郁動嘅話,有機會造成短暫紅瘀,梁太表示醫生係有心,但筆者亦唔排除係無意。

梁太喺帖文說明醫生嘅惡劣態度,而且專登整傷小朋友,齋睇梁太嘅語氣,筆者認為梁太先入為主嘅態度都有問題。而且梁太開初諗住睇醫生順便寫健康紀錄,此順便就不同彼「順便」,並唔係去街市買菜搭棵蔥咁簡單,既然係另一項工作,另外收費係正常不過,有部份媽媽網友表示幫襯嘅醫生可以順便寫健康紀錄,咁筆者建議各位媽媽都係先格價,免得誤會醫生服務開出海鮮價。

健康紀錄嚟講呢,除咗小朋友入學,長大後入職都經常遇到架!筆者之前做過教育工作,每年都需要更新健康紀錄同照肺,確保工作環境同學童嘅健康。健康紀錄並唔係醫生見你表面健康就隨手寫身體健康,需要度高磅重,體格檢查(眼,耳,皮膚,心臟等等),仲會列出特殊病歷。健康紀錄的確係需要一定程序,如果想搵較便宜嘅醫生可以Google"幼稚園健康紀錄平D"。

筆者建議其他媽媽下次想網上公審應該先搞清楚自己邊個小朋友受傷,而且要準備好所有「證據」先放上網,好似梁太又要經過多位網友嘅查詢先喺回應放出警察同醫生對話嘅短片(圖),不過睇完更加覺得唔係好理解梁太嘅論點。

*小朋友「被醫生所傷」,既然已報警竟然唔係去驗傷,而係趕時間走?
*梁太對盈健旗下醫生嘅操守有不滿,可以向醫委會或者盈健作出投訴,更加可以搵媒體報導公開事件,報警只列作普通糾紛。
*梁太以帖文單方面批評醫生操守筆者無評論,不過公審無經過雙方嘅回應再作評論,以梁太嘅一面之詞對醫生確實好唔公道。
*梁太去到最趕時間先搵(同一位)醫生?隔離(附近)都有醫生睇,既然唔滿意佢地嘅收費,點解要堅持搵返同一個醫生?
*唔知大家有無機會遇過,無論警察甚至法官都會喺合理情況下「串吓」市民,點解醫生唔得?醫生唔可以覺得你戇居?
*診所係私人地方,尤其應診室唔應該輕易動用鏡頭。「權利」並唔係大晒,顧客亦唔係大晒。

後話:普遍認為,過份保護孩子而做出奇怪行為嘅父母被稱為「怪獸家長」,形容家長自我中心,經常為孩子嘅大小事情向學校/其他地方作出投訴。簡單嚟講就係以為世界只係圍住你(嘅小朋友)轉,好易同其他人產生誤會。

而過份關注孩子嘅父母就被稱為「直升機家長」,形容家長好似直升機一樣,盤旋喺孩子身邊,隨時(空降)幫助解決問題。筆者對別人嘅家事並無意見,不過可憐小朋友長大之後就知味道。

(個人意見專欄,歡迎各方理性討論。)

如果喜歡我們的文章,請即分享到︰

留言


請按此登錄後留言。未成為會員? 立即註冊
    快捷鍵:←
    快捷鍵:→