【佛系麻媽】入幼稚園做足準備：給同樣唔緊張的你

人哋話生個大B讀書有著數，似乎都係，除咗小朋友學習能力高啲，對佛系家長都有多啲時間準備！ 點解咁講？話說我有幾位朋友早我幾個月生年尾BB，喺BB幾個月嘅時候就要去面試入PN！下？咁我係咪要去報？
我嗰刻先上網睇，真係嚇咗一跳！乜差3幾個月就要遲一年入學？(突然又變得好漫長...) 不過，原來PN班又唔係咁計... PN班要足2歲入學，但到暑假後班大B又未足3歲無得上K，變相PN要「留班」讀多年。好喇，大家唔好以為咁就清楚晒！ 而家有樣嘢好奇怪，就係級別，想當年幼稚園3年就係K1、K2、K3，而家仲加埋咩咩PN、N都唔知咩嚟！ Pre-Nursery即係2歲班，好多學校而家會咁分：PN(2歲)＞N(3歲)＞Lower/LK(4歲)＞Upper/UK(5歲)，亦有學校用N代表2歲班，之後跟返K1、2、3，所以一定一定一定要了解清楚心儀學校嘅情況先唔會錯過報名期！ 講咗咁耐終於入正題，作為佛系麻媽，我選幼稚園只有一個大原則，就係近！屋！企！咁啱屋企樓下就有一間有PN嘅「國際」幼稚園，好喇，我嘅目標一下就考慮完畢。 接落嚟就要開始了解間學校，同時要了解下而家「返學」係咩一回事，所以我喺小朋友8個月左右「終於」加入同區幾個媽媽WhatsApp群組，方便接收區內活動或者有咩學校開放日嘅訊息。貼士1：留意區內幼稚園、興趣班學校開放日，預早俾小朋友接觸「學校」呢樣嘢
貼士2：留意心儀幼稚園開放日日期，直接到學校查詢想知嘅問題 貼士3：如果心儀幼稚園有playgroup或者任何親子班、興趣班可以報名參與，俾小朋友熟悉學校環境，減少面試日膽怯嘅機會 佛系嘅我第一次去學校開放日當然就係「樓下間幼稚園」，仲同小朋友報埋佢嘅playgroup(要排隊..)，希望佢熟習呢度嘅環境，留意返，係「學校環境」，唔係學習環境！ 之後仲有去唔同學校嘅開放日
然而，話說過咗1歲就可以報名PN班面試... (待續)

是次小分享完畢，有興趣可按 麵語錄食玩遊記 by Aminn 或 C家重地 Be a Asterholic 其他分享 :)


Aminn | Beauty．Food．Fun．Parenting．Trendy｜



麵語錄食玩遊記 by Aminn (Lifestyle)
www.facebook.com/m.for.aminn
www.instagram.com/starzaminn

C家重地 (Parenting)
www.facebook.com/sy.lam.family　



任何合作請接洽：aminn613@gmail.com