[TRAVEL] 福岡六日五夜咁樣玩の賽前準備

CHUNGDADA 於 22/02/2017 發表 收藏文章
去旅行是開心的,但準備旅程是不輕鬆的。
買機票、揀酒店、編排行程、查看交通路線同時刻表、
上網搵有咩必行景點必吃美食必買手信又要符合團友們的口味喜好。
雖然搞手呢個角色吃力不討好,但每次安排完一個行程然後團友們玩得開心又滿足真係乜都值返唒。

一月嘅時候就去左福岡玩左六日五夜,團友係自由行入面最麻煩的旅伴對象-父母。
麻煩在於每樣嘢都要安排得剛剛好,最好來回每個景點交通時間計得剛剛好,費事老人家久等。
最好酒店在市中心的市中心,費事老人家每晚玩到攰一攰仲要攀山涉水先返到酒店。
行程要充實又不可以太滿,晚餐要用心計劃過又不可以劣食………

於是,呢個福岡六日五夜團消耗左我好多青春而回報係好多條白頭髮。
除左以上嘅煩惱外,仲有係因為九州太大,要係有限時間內去你想去嘅地方確實需要精心策劃一下。
搵左啲資料唔想浪費,又想紀錄下是次旅程,同大家分享下我玩左啲咩,所以就第一次學人寫遊記喇!

福岡始終未算係大城市,比起大阪東京未算熱鬧,
同朋友講起去福岡旅行,有人反應係:「下?你唔驚輻射?有咩玩呀?」

首先要同大家釐清福岡同福島係兩個不同的地方。
發生311地震嘅係在日本東北部分嘅福島,而福岡位於日本的西面、九州的北部,係九州的中樞都市。
福岡人口約五百萬,係擁有千二萬人口東京嘅一半都冇,感覺福岡人嘅生活都好悠閒(笑)。

一般世界各地嘅機場都位於沿海位置,但福岡機場係位於市內嘅博多區。
從福岡機場到博多車站,搭乘地下鐵僅只需5分鐘時間,而到天神就大約11分鐘,交通方便得很。


今次旅程係搭香港快運由香港去福岡嘅,去程時間係1250至1715,回程係1245至1545。
揀得香港快運我都唔期待有咩機艙內嘅享受,純粹當搭架巴士咁去到目的地就算。
冇特登係做Mega Sales嘅時候去搶機票,所以三人機票為$5000左右,香港快運來說不算是便宜。


由於九州太大嘅關係,今次我地就決定縮細範圍先玩北九州,
玩法係以福岡為中心,放射狀玩其他景點。
同父母商量過後,決定今次會玩熊本、由布院、別府、下關、門司港呢幾個地方。

如果唔係自駕遊同埋唔係淨係玩福岡嘅話,JR周遊卷係一定一定要買嘅(比起分開購買平太多喇)。
今次北九州六日五夜嘅行程我地就買左北部九州版鐵路5日券。


北部九州版鐵路周遊券可以去到嘅地方有:
下關、門司港、小倉、博多、由布院、別府、大分、熊本、阿蘇、佐賀、長崎、豪斯登堡、佐世保;
全九州版鐵路周遊券可以去到嘅地方有:
下關、門司港、小倉、博多、由布院、別府、大分、熊本、阿蘇、佐賀、長崎、豪斯登堡、佐世保、三角、人吉、鹿兒島、霧島、指宿、宮崎。

周遊券可以係旅行社、JR車站綠色窗口買,而我就係香港快運機上購買,然後去JR車站綠色窗口兌換。
其實機上價錢沒有特別便宜,但感覺就好像節省了一點時間。

↓ 更多九州版鐵路周遊券詳細資料到這裡看 ↓
http://www.jrkyushu.co.jp/chinese/railpass/railpass.jsp

然後很重要的是……!
最好第一天落機後就馬上去JR車站綠色窗口買周遊券同埋劃位、劃位同埋劃位!
因為好多地方景點講緊都係幾個鐘車程,如果唔揀好位又唔好彩班車好滿的話就不好不好了……
而且有啲特色列車如「由布院之森」係超級十分受歡迎,如果唔想錯過就最好儘早去揀好指定席位子。


係福岡放射狀咁玩,所以酒店都係揀係福岡嘅市中心-Hotel SUNLINE福岡博多站前。
酒店內嘅軟硬件就跟一般酒店差不多,沒有特別令人驚嘆嘅地方,所以就冇特別推介呢一間酒店喇。
但酒店地理位置算是不錯,由博多車站行五分鐘左右就到達酒店,沿路都係商店同其他酒店,
對面有個浴場樓下有七仔同Family Mart便利店,如果對酒店冇特別要求但求方便嘅都可以住下。

↓ 更多Hotel SUNLINE福岡博多站前詳細資料到這裡看 ↓
http://www.h-sunline.co.jp/hakataekimae/

上網睇酒店最方便價格最抵嘅都係Agoda
但日本酒店嘅話我好推介Japanican,資料齊全準確之外,佢地嘅客服仲好有效率添咖!


賽前準備就差唔多搞掂喇!我地下篇文章就出發嚕。

| http://chungdadada.blogspot.hk/ |
| adachung414@yahoo.com.hk | chungdada@yahoo.com.hk |

/ Blogspot / FanPiece / BeautyExchange / F&B Blog /
iMore Blog / theZtyle Blog / Beautylife / SHE Blog / U Beauty Blog /

| More in Instagram |

如果喜歡我們的文章,請即分享到︰

留言

會員
我要評論
請按此登錄後留言。未成為會員? 立即註冊
快捷鍵:←
快捷鍵:→