我做咗一日女朋友隻右手 精選 推薦

前排喺電視見到馬明，一見到佢個樣就無名火起，呢條友無論係咩劇情、咩對白，都100% match到樹熊「食葉樣」。　　
我咁激動，因為我個名…都係叫馬明。而我女朋友就當正我係馬國明咁玩。
　
話說今日返緊工嘅時候，女朋友突然SEND 咗個whatsapp畀我。
　
『救命！快啲嚟救我！』
　
我打電話畀佢問吓咩事，原來佢今朝追巴士時仆低，搞到隻手臂甩骹…
　
我真係第一次聽人追巴士追到甩骹，當場就笑到收唔到聲：「咁妳最後追唔追到架巴士？」
「你弱智嫁？我去醫院啦，仲追架車嚟做乜啊。」「咁…即係點啊？」
「嚟醫院接我啦仲問！」
　
我趕到去醫院，喺門口就見到女朋友隻手包晒繃帶坐喺度，塊面仲黑過包青天。於是，我打算學韓劇咁衝上前攬住佢。
　
點知女朋友一手推我：「啊啊啊啊！我隻手好Ｌ痛啊！你做乜啊！」
　
「有冇咁痛啊？我見張家輝甩骹都係自己搞掂～唔使怯喎…怯你就輸一世啊！」
「好叻啊？咁多金句，你估自己係黎明啊？你馬明咋！」
　
佢又話：「醫生話我第一次甩骹，呢幾日都要固定隻手臂唔郁得啊。」
「咁妳想我點？」
「呢段期間，你要做我隻右手！」　
就係咁，我嘅右手生涯就係咁展開咗。佢由離開醫院嗰一刻開始，就全程撓埋隻手，連開的士門都要我開。送佢返到屋企，女朋友就話：「有啲熱喎，等我用右手去開冷氣先得！」
　
「吓？哦…」扮演緊右手嘅我，就去咗開冷氣。
　
跟住女友又話：「口喝啊，去斟杯水先。」於是我又斟咗杯水畀女朋友。
　
「我肚餓啊…」佢好似有啲玩上癮咁。
「我即刻去煮嘢妳食！」
　
為咗氹返女朋友，我嗱嗱聲走入廚房煮咗個辛辣麵，點知女朋友望住碗麵話…
「馬明，你係咪串我隻右手揸唔到筷子啊？」　
幸好我魯芬急轉彎，即時補鑊：「我係右手，梗係我餵妳食啦！」
　
原本我以為餵女朋友食麵，會好似韓劇咁浪漫，點知現實只係一套搞笑嘅綜藝節目…
無論我幾小心都好，筷子唔係戳到佢個鼻，就係打到佢下巴，碗麵都漲晒先食到半碗…
　
「不如用叉啦好無啊？」女朋友。
　
我入廚房拎隻叉繼續餵佢食麵，但我開始發覺有啲唔對路…
女朋友塊面仲紅過馬騮屎忽！
　
「點解我塊面好似畀火燒咁嘅？」女朋友問。
「唔係吖～無咩事喎。一係我去拎條毛巾畀妳抹一抹面啦～」　
嘩我頂！大鑊！唔可以畀女朋友見到自己咁，我飛奔入廁所用凍水濕咗條毛巾。突然間，女朋友走咗入嚟從後攬住我…
　
「多謝你全日咁仆心仆命照顧我啊，又煮麵畀我食，我唔係有心發你脾氣嫁，但我隻手真係好痛，又嬲自己咁論盡。」
　
我仲以為咩事，嚇得我吖…
我話：「如果我係右手，妳就係左手，我哋永不分離。」
　
突然，女朋友好大力咁推開我：「馬明死開！」
佢兩隻眼睩到牛眼咁大，全身震晒，十足鬼上身咁款。原來佢望緊廁所塊鏡…
而鏡入面，有個女版關公…
　「我塊面發生咩事…」
「我諗妳塊面唔太受得辣…」
「我塊面唔受得辣？我唔啱啊？你唔好成個呆樣咁啊，你以為自己馬國明啊？！你馬明咋！」
「好對唔住啊～」
　
我以為就算無韓劇咁浪漫，都會好似TVB劇咁結尾男女主角大團圓，但現實又點會咁完美吖…
　
「我唔理啊，我罰你做晒屋企所有家務，換床單洗冷氣機洗雪櫃！」
　
我覺得今次事件，應該歸咎於馬國明！佢繼續喺電視機面前露出一副食葉樣，令女仔以為全香港男人都係食葉…再咁落去，大家都無運行。