【千祈唔好帶女友去環影影城！因為佢會當自己係小朋友！】 精選 推薦

女朋友小豆話，去大阪可以唔食大阪燒同章魚丸，但一定要去環球影城！我心諗「吓？唔係嘛，聽聞章魚燒好食到流眼淚嫁喎，點可以唔食…」　
「係囉！你諗吓環球影城係幾重要呢！Yeah！」
　
「係啊Yeah…」呢一刻，女朋友好似宋世傑上身咁，死都拗返生。
　
其實我一早打算去環球影城，因為有我同佢都咁鍾意嘅《哈利波特》做主題嘅園區，女朋友為咗加深記憶，仲特登「邀請」我參加一至七集電影播放馬拉松添～
　
佢仲特別提醒我，話：「就算唔預約和服，都一定要訂環球影城門票同快證，聽聞哈利波特快證每日都有限人數嫁！」
　
「咩啊，又話和服一定要預…」我講到一半就知道發生咩事，唔訂和服都要擰甩個頭，萬一當日去到先話快證賣晒，我真係唔敢想像個後果會係點。　
好啦，上官網登記做會員又搞咗一輪，終於成功訂咗飛，將個QR CODE印出黎，出發當日仲檢查咗５次自己真係有將門票同快證放入背囊，以防萬一。
　
當日，我同佢差不多樂園一開門無耐就到達，即刻就衝去玩咗哈利波特園區先（快證有預約時間），女朋友一入到去就完全融入咗個樂園嘅氣氛，又跑又跳。
　
「我哋鬥快去哈利波特園區吖，邊個輸邊個就係麻瓜！」講完呢句佢就一支箭咁衝出去。
　
「喂…妳衝咁快做乜啫，妳都唔識睇地圖…跟住我啦。」
　
佢死死地氣咁行返埋黎：「你個死麻瓜！」唔忿氣嘅佢一嘢搣落我背脊。　
入到園區，梗係例牌要瘋狂影相啦～不過喺唔著和服嘅狀態下，佢仲好鍾意瘋狂咁幫我影相…
　
「你又話鍾意榮恩？你扮佢，我幫影你吖！」
「好啊！」我真係好鍾意榮恩，仲買咗佢支魔杖添。
「影多張。」
「哦。」
「你企呢度，擺另一個姿勢影啦！」
「無姿勢啦，不如我哋去第度再影…」
「呢度都未影完，你扮出魔法啦～」
「…」我聽佢講拎住支杖扮出魔法，但女朋友對焦又唔知點解特別慢，唔係對錯位就係手震，每次途人都會望晒過黎。
「得、得未啊…」
「Hold多陣，畀少少耐性！」　
「係哈利波特去學校架火車啊！你快啲扮追火車，我幫你影！」
「呢度有隻怪獸，你扮驚吖～」總括黎講，佢好識得自己點樣「被攝」得靚，但就鍾意叫我擺奇怪姿勢影相。
　
除咗企定定影靚相，佢仲鍾意叫我影佢唔覺意行緊街、睇緊嘢、過緊馬路時候，影幅又自然又靚嘅相。
但係！！通常呢啲情況就出事！！
　
「呢張隻眼好似未訓醒咁嘅？」
「嘩嘩嘩！雙下巴出晒黎！」
「呢幅隻眼斜視之餘隻腳仲咁短…」
　
「咁妳又話要自然…」
「自然得黎要靚嘛～我平時係咁醜樣嫁咩？」「梗係唔係，係我捕捉個時機太差！」呼～逃過一劫…
　
黎得遊樂場梗係要玩機動遊戲，小豆幾乎去每個地方旅行都會去當地遊樂場，但其實佢唔太玩機動遊戲，膽量介乎於110~120CM之間。咩意思？即係話若果個機動遊戲限制高度要超過120CM，就代表佢接受唔到個刺激程度。就連哈利波特個４Ｄ禁忌之旅，佢都話嚇到個心離一離，「好似真係飛咗出去咁啊！不過就好好玩～」呢類遊戲已經係佢極限，順帶一提，東京個迪士尼極限就係Space Mountain。
　
咁超過120CM嘅機動遊戲又點呢？佢會叫我上去玩…
　
「我會睇實你玩㗎，你玩完講個感受畀我知！」
　
我玩完過山車之後返去搵到佢，佢捂住個心口話：「頭先我望住你玩，好似自己玩咗咁啊！你頭先有乜感覺？」　
「轉到好暈，我都唔知自己轉到邊，仲有離心力都幾勁，我而家有少少腳步浮浮。」
　
「你咁勁嘅！聽完你講我都有少少驚，我哋去玩另一個啦～」佢一邊拍心口一邊拖住我去另一個機動遊戲。
　
於是乎我又走咗去玩另一個機動遊戲，佢視覺上望住我玩，再加埋我事後描述嘅感受，綜合起來就代表玩咗個機動遊戲。
老實講，作為男朋友，有邊個唔想女友用望英雄嘅眼神黎望住你吖。
但其實…有時我都有少少淆底，只不過係死撐話唔驚。
每次同女朋友去遊樂場，見到佢成個小朋友咁，連自己都會暫時忘卻一切煩惱，傻吓傻吓咁笑足一日。
呢個就係同佢兩個人嘅化學作用，要好好珍惜一個令你變得白痴嘅女朋友。
ig：BlueGodZi
專頁：http://www.facebook.com/BlueGodZi