【千祈唔好對女朋友影相技術有太大期望!】

藍橘子 於 01/03/2016 發表 收藏文章

喺女朋友心目中,去旅行除咗購物,最重要係影相。我唔介意幫女朋友影相,因為佢覺得自己靚時,我都覺得佢靚。但佢當正我係專業攝影師咁,對影每幅相都非常有要求。
 
「高少少影落黎,咁我塊面會瘦啲、隻腳長啲、隻眼都大啲!」女朋友嘅要求。
 
「係咪咁?」
「唔係啊!你高到我得返個頭喇!你斜落黎嘛!」女朋友唔多滿意。
於是我又影多幅:「係咪咁、咁?!」
「乜喺你心目中,個女朋友係咁肥㗎咩?!」女朋友開始進入母夜叉mode,即是話我再影得衰就死硬了…
 
「啱喇!今次做得好好喇!但後面有幾個途人望鏡頭,再影多張。」女朋友對相嘅執著,就連背景都要顧及埋…
 
結果,同一個景同一個姿勢,影咗十幾幅之後…
 
「都係第2幅靚~」
「咁你叫我影咁多幅?!」
「我睇你仲有冇得進步嘛~去下一度影啦!」
 
作為一個「女朋友專屬龍友」經過長時間嘅訓練,我就記熟咗呢個「黃金角度」,可以令女朋友塊面尖啲、隻眼大啲、隻腳長啲、最重要係心情靚啲…
 
相反,我自己對影相唔係話太執著,只求留個記念,但係…
 
「影完未?」我企咗喺度十秒,女朋友先影到一幅相。
「搞掂~好靚啊!」佢豎起姆指讚自己。
 
我拎起部相機一睇,我好似識分身術咁有幾個殘影…
 
「妳、妳對焦先影嘛…」
「哦!」
 
下一張背景好靚,但我個人黑到成舊炭咁,女朋友對焦咗落個背景度…
 
「你點落我個頭度對焦吖!」
「哦~你早講嘛~」
「算啦,妳不如幫我由下面影上去,影到我撳住個塔咁嘅效果!明唔明?」
「OK無問題!」
 
女朋友踎喺地下,一臉認真咁調整角度…
「完美啊!我簡直係攝影大師!」
「係咪真㗎…」我有啲半信半疑。
 
結果,我收到幅上面嘅圖…
「妳又話OK,我完全無撳住個塔…」
「差少少啫~我又唔係專業攝影師!」
「差好遠啊!遠到有時差啊大佬!」但女朋友好似聽唔到咁,拉咗我去第度影相…
 
於是乎,我手機同相機就充滿住女朋友嘅靚相。同埋一堆我施展緊影分身術、黑炭式剪影、同擺出莫名其妙姿勢但又唔知做乜嘅相,仲有少部分女朋友表情崩壞嘅相。
 
呢啲相我通常都唔會delete。
因為有時同女朋友兩個人睇返呢啲充滿回憶嘅相。
每次都會笑到碌地,兩個人開開心心又一日,
幸福就係咁簡單~
 
(分享畀妳嘅專屬龍友,向佢以示謝意啦~)
——————————
 
出版咗一個月:《無病你呻乜嘢吟》
ig:BlueGodZi
專頁:http://www.facebook.com/BlueGodZi

如果喜歡我們的文章,請即分享到︰

留言

會員
我要評論
請按此登錄後留言。未成為會員? 立即註冊
快捷鍵:←
快捷鍵:→