《IG𥄫女要付好大代價。》

　　對唔少人嚟講，冇咁多時間去沙灘、冇咁多閒錢玩船P、最重要係自己身邊冇咁多靚女朋友，喺IG𥄫女自然成為生活嘅一部份：一班靚女又三點式又晚裝露背低胸咁吸引，最重要係好多都冇Set到Private，唔Follow都對唔住自己啦係咪先。
　
　
　　但你有冇諗過依個行為其實令你付出咗幾大代價？
　
　
　　對一個男性嚟講，有IG好正常，𥄫女更加係天生男性本能，但當兩件事加埋一齊就會有好多女性覺得你IG Follow埋咁多囡囡肯定唔係正人君子。就好似如果你銀包袋住個Condam，你就係一個Player（靚仔的話）或者雞蟲，而唔係一個著重安全性行為嘅普通男人，或者純粹係上年平安夜人地街邊派比你但你成年都冇機會用嘅可憐人。　
　
　　如果你已經拍緊拖，你女朋友會覺得你肯定晚晚都開住個IG嚟J，又或者同你講「Follow咁多女係咪覺得我唔夠索」然後發你脾氣。冇錯，佢地容忍唔到你喺街𥄫女，自然都唔想你喺IG𥄫嗰班佢地口中「放咁多J圖上IG都唔知係咪做PTGF想吸客」或者「咁鐘意比人𥄫肯定平時周圍發姣」嘅IG女神。你明白你女朋友係呷醋，冇女仔鐘意男朋友睇其他女仔，但當你望到佢IG Follow一堆韓仔或者本土男神嗰陣，你唔知自己應唔應該呷醋呷埋一份。
　
　
　　正如佢可以話你有肚腩，冇六嚿腹肌要學下人咁操；但你唔可以話佢肥咗，或者係人地上圍比佢多兩個Cup一樣咁難捉摸。　
　
　　你以為冇女朋友就可以光明正大咁Follow？錯啦，為咗比你身邊嘅女性一個好印像，你IG更加要小心選擇Follow嘅對像。你可以搵啲外國女明星或者幾個有氣質嘅女仔嚟Follow，但幾個好啦，唔好多，如果唔係你就會同鹹濕扯上關係。賣弄性感嘅女最好敬而遠之，雖然我明白真係好吸引，但佢地永遠都係女仔間嘅大敵。女仔就係咁樣，佢覺得你喺冇人睇到嘅情況下睇AV打飛機係人之常情，正常生理需要，但你IG Follow嘅IG女神一多過十個以上，你就係一個比睇AV更唔要得嘅人。
　
　
　　我明IG真係好多高質嘅囡囡，我都明要你忍手甚至Unfollow佢地係好殘忍。但如果你唔想嚟緊嘅日子都只可以靠IG睇女仔，想可以再擴闊下身邊異性圈子，增加多啲更進一步嘅機會，你係時候做依個決擇。　
　
　　好假好門面？係啊，做人就係咁架啦。
　
　
一個讚好，是對我的一點支持。
如果想分享給其他朋友的話，請標明出處並附上專頁網址。
FACEBOOK：https://www.facebook.com/MOYINDAY
TUMBLR：http://moyinday.tumblr.com/
Fanpiece：http://women.fanpiece.com/moyinday/
Medium：https://medium.com/@moyinday
圖片來源：yueer_moonlover_ 個IG