AA制?你比?我比?食餐飯都咁麻煩。 文字

毛言地於 25/04/2017 發表 收藏文章
  男女之間嘅問題真係多到數唔哂,就好似噚晚又有人食飯食到大打出手。男嘅要請,女嘅要AA,放眼現今香港肯定係最啱異性口味,有邊個男人唔想同女仔食飯可以比小一半?有邊個女人拎銀包出嚟真係想比錢?(嗱,比喻嚟,我識好多女仔會咁做嘅OK?我冇抵毀女性。)
 
 
  我好鐘意同人食飯,一班人又好兩個人又好、男又好女又好、識咗好耐又好第一次食飯又好,食飯嗰陣大家淨係需要望下菜單有咩食,然後坐定定等人送過嚟就得,唔洗漫無目的行住個商場是但搵間鋪入又冇嘢啱一兩分鐘出返嚟。而且食飯嗰陣邊食邊傾,一時講下白痴嘢,一時講下份工,兩個人嘅交流都冇咩舒服得過咁。直到個甜品嚟之前我好都好享受同每個人食嘅每餐飯,但當大家都放低隻甜品羮,堆單氣氛愈嚟愈重,我心入面就開始盤算緊到底一陣張單應該點埋。
 
 
  一班人食還好,總數除返開人頭,毫子四捨五入,最多咪比多一兩蚊,總好過賣旗賣咗比紅底機構。但兩個人,特別係一男一女,由我舉手示意埋單嗰一刻,我就要留意住個女仔有冇拎銀包出嚟嘅意圖,有拎嘅又要諗佢真係想比定做樣,然後再決定叫唔叫佢收返埋個銀包。有啲女仔好識做嘅,大家第一次見面都會自動AA,做咗幾年朋友就更加唔洗講。但有啲唔係好熟見過幾面,因緣際會遇到;又或者最近識到新朋友約佢出嚟一齊食個飯,見到佢大安旨意等你比哂咁樣,你唔知係佢真係未試過出街食飯要比錢吖,定係以為你對佢有意思所以你會比哂。
 
 
  老老實實,如果真係鐘意一個女仔,入餐廳之前就講到明我比啦,貪喺餐廳啲錢推嚟推去好似啊婆飲茶爭比嗰百幾蚊咁好睇咩?如果冇講到明,我諗每個人出街食飯都知到要比錢,我都唔知點解有人會好意思食免費晚餐--我好想咁講,但礙於「男女唔平等,女性仲未爭取到平權」嘅關係,比錢依啲粗重工夫都仲係由男人搞掂為主。算啦,身為一個香港男人對於耐唔耐就要請一餐半餐已經習慣,不過就算你冇諗過比錢都好,扮下嘢拎個銀包出嚟打開佢,我地男仔條氣都叫順啲,然後叫你收返埋,起碼冇嗰種擺到明做咗水魚嘅感覺。
 
 
  有啲女仔話如果男人愛你就會幫你埋單,其實依句嘢同「如果女人愛你就會比你屌」一樣,都唔知咩人諗出嚟。莫講話愛你都唔一定會包養你,而家我同你第一次食飯炸,你點解咁肯定我冧你?我當你係飯腳得唔得先,你會唔會叫隻酒腳比埋你啲酒錢?你會唔會叫雀腳包你個出沖啊?約你打牌係因為我想搵人打牌,約你食飯係因為我想搵人食飯。如果你真係冇諗過比錢嘅其實可以講定先,咁想約你食飯嘅男仔自然心中有數。
 
 
  想人請你食飯,用一句說話做成本,唔過份吖?
 
 
一個讚好,是對我的一點支持。
如果想分享給其他朋友的話,請標明出處並附上專頁網址。
FACEBOOK:https://www.facebook.com/MaoYanDe
TUMBLR:http://moyinday.tumblr.com/
Fanpiece:http://women.fanpiece.com/moyinday/
圖片來源:網絡取材
標籤: 毛言地  兩性  AA制  

留言

會員
我要評論
請按此登錄後留言。未成為會員? 立即註冊
  • 丁力大衛
    丁力大衛 於 28/04/2017 評論 NO. 1

    不能認同更多~👍

快捷鍵:←
快捷鍵:→