有邊個會想落得分手收場？

　　冇咩人拍拖就係為咗分手，除非你想報復。
　
　
　　喺得埋一齊，點都希望今次係搵到一個啱嘅人，唔洗再經歷一兩年後先發現愛錯人然後又要行到分手一步再傷心欲絕。偏偏有一班人唔係冇拖拍，但就係搵唔到一個可以定落嚟嘅人：一係拍拍下覺得人地唔啱你，一係拍拍下發現比人玩嘅原來係自己。
　
　
　　今日，你又同啊邊個分咗手。佢係你第幾個前度？你數嚟數去都發現好似漏咗幾個，淨係記得離離合合十幾廿次，就係搵唔到一個相處落嚟會真心舒服嘅。點為之舒服？即係你唔洗為咗迎合佢喜好做埋啲冇興趣嘅嘢，但佢對你口中嘅興趣又真係一啲興趣都冇；每次出街佢都話好悶有冇咩好做，結果你行哂香港十八區都唔知點先啱佢胃口，最後出街成為你最怕嘅節目；甚至係你滴酒不沾但佢喜愛夜蒲，或者你超凡脫俗但佢如狼似虎（我講性啊）咁樣，總知喺段關係入面你總係會覺得有唔如意，而你地雙方又冇去解決嘅意欲。　
　
　　點解？因為大家都慣咗合則來不合則去。
　
　
　　再恩愛嘅男女都經歷過由兩個世界走埋一齊嘅時間，你可能羨慕佢地嘅合拍同心領神會，但當中佢地磨合咗幾耐你可能估都估唔到：你永遠淨係要人迎合你興趣，但又有冇諗過對方陪煲劇嗰陣你從未試過陪佢打機？你覺得出街好悶，咁點解唔諗下兩個人喺屋企睇下YouTube煮下飯都可以好Sweet？你兩個一齊或者會遇到好多問題，但點解你地唔願意大家一齊去搵一個解決嘅方法，而係執意要對方跟自己嗰一套行？
　
　　　如果一個人只係為咗搵一段「啱自己」嘅愛情，咁你拍幾多次都係失敗收場：因為你冇諗過對方都係人，對方都會有個人感受。如果你拍過咁多次拖都仲未明依個道理，唔好問點解你拍親拖都唔長啦，不如問下自己點解仲要浪費人地時間？
　
　
一個讚好，是對我的一點支持。
如果想分享給其他朋友的話，請標明出處並附上專頁網址。
FACEBOOK：https://www.facebook.com/MOYINDAY
TUMBLR：http://moyinday.tumblr.com/
Fanpiece：http://women.fanpiece.com/moyinday/
圖片來源：網絡取材