《有時候男人都想有女人氹》 精選 推薦

　　男人唔介意自己一個頂起成頭家、唔介意不論對錯向女朋友認低威、更加唔介意旅行全程擔擔抬抬，用個幾鐘陪女朋友買化妝品。「應份」兩個字加諸男人身上，而男人亦都冇推開依份責任，一直盡自己能力去比女朋友最好嘅感受。只係再鋒利嘅刀都有生銹嘅一日，同樣再硬淨嘅男人都有佢軟弱一面：面對工作、面對生活、面對外母嘅壓力，有時男人都好想做一陣弱者，有人比佢攬下，摸下佢個頭，講幾句安慰嘅說話。男人都想有女人氹，因為男人都想感受到一段關係中嘅愛。
　
　
　　男人其實好簡單，鐘意嘅嘢嚟嚟去去唔係高達就係打機，再唔係就係著住件好性感泳衣出現喺張床嘅你。不過平時你話砌模型好宅男，掛住打機又唔陪佢，有下性幻想都話個男人變態，結果個男人為咗令你高興，令自己喺你心目中變得更好，果斷放棄自己所有高達，打機淨係敢喺你瞓咗唔洗傾電話之後玩兩鋪，做愛做的事嗰陣都唔敢提乜特別要求。因為愛你，男人願意放棄平日喜好；如果比佢知道你因為愛佢，你肯得閒陪佢打下機，星期日夜晚開住J2睇半個鐘鐵血孤兒（雖然男人一早睇完，但有你陪係另一回事），甚至床事比啲驚喜佢，男人已經開心到飛起，覺得你係最好嘅女朋友。你可以話男人大唔透，但返工已經好複雜，平時對住最愛嘅你想做下大細路又有咩問題？　
　
　　對男人嚟講送咩比女朋友係一大難題，佢地生日、情人節、聖誕節嘅禮物要求完全唔同。試過一次前度同我講佢好鐘意美少女套變身器，嗰時臨近情人節我緊係搵比佢啦。搭哂天地線問，搵個朋友帶路，食埋炒價先入到手，點知佢收到一啲開心都冇，仲話依份肯定唔會係情人節應該送嘅禮物。你當然可以話我放禮觸覺差過送禮勤，但對男人嚟講禮物代表嘅係心意，就算女朋友送咩都好都會為佢花時間去揀份禮物而感動，實用至銀包古龍水，簡單至一個電話殼，一個愛心飯盒，每樣嘢男人都會珍而重之。只要係女朋友送，每一件都係無可代替嘅寶物。有時男人都希望自己女朋友會買啲禮物仔比佢，證明女朋友仲係關心自己，都希望繼續Keep住依段關係。氹嚟氹去，成世人都係要咁過架啦係咪？　
　
　　其實女人希望喺愛情當中得到嘅嘢男人都想要：被愛，被珍惜、被關心、被重視。可能男人深明佢永遠要企喺你面前擋風擋雨唔可以示弱，又可能礙於面子唔好意思講出嚟，有時佢地好想你氹但始終講唔出口。如果你已經好耐冇氹過你男朋友開心，不妨一陣試下話陪佢打鋪機，或者聽日買份小禮物送比佢。望住佢臉上面嘅快樂同驚喜，你就會知道男人想要嘅真係好簡單。
　
　
　　只要有你嘅體諒同了解，男人已經得到一切。
　
　
一個讚好，是對我的一點支持。
如果想分享給其他朋友的話，請標明出處並附上專頁網址。FACEBOOK：https://www.facebook.com/MaoYanDe
TUMBLR：http://moyinday.tumblr.com/
Fanpiece：http://women.fanpiece.com/moyinday/
圖片來源：網絡取材