拍拖正式學名係陪女行街。 精選

　　喺香港拍拖，行街睇戲食飯基本上係指定動作，大家都唔會覺有幾出奇。行街陪女朋友睇下女裝、睇戲就愛情片為主、食飯多數非日即韓，大多數人拍拖都係咁，你唔會對以上節目有咩意見。

　　咪住，以上有邊樣嘢係男人想做？如果睇嘅女裝係情趣服飾男人會醒神好多嘅、睇戲女朋友揀嘅通常唔啱自己、食飯更加唔好講，餐餐幾百蚊你估唔肉痛？但點解拍拖做嘅嘢好多時都偏向女生喜好方面？當然你可以話男人禮讓好正常，但拍拖唔係兩個人，唔係雙向咩？如果你仲信香港有男女平等你就太天真，喺香港拍拖，根本就係陪女行街嘅代名詞。
　　拍拖時自拍少不免，不過通常放相都係女方，男方只係被TAG果個。好簡單，因為要話比人知我有拖拍或者哂命果個好多時係女仔。男嘅除左得手果一日之外都好小會隨便扔閃光彈，但女仔日日放閃已經係習慣，如果佢有一個禮拜冇影相，你就知一家同佢男朋友有啲嘢。

　　同樣道理，因為要放閃果個係女朋友，所以見到Tsum Tsum啊Hello Kitty公仔佢地一定會要你幫手影，甚至拉埋你一齊影；但你見到Gundam模型果陣唔好諗住搵到佢同你自拍，佢只會企埋一邊用「見到一個毒撚」嘅眼光望住你。你問我點解Hello Kitty同Gundam都係卡通動畫，電視都有做過，點解女仔鐘意Hello Kitty就正常，男仔鐘意Gundam就毒？你唔好問我，你搵個女仔問，有答案話埋我知。
　　當然啦，搞到今時們今日咁樣男士們嘅責任都幾大下，當日就係太過遷就女仔先會搞到男人而家拍拖差唔多得返啪啪啪係自己真心有興趣嘅拍拖活動咁濟。好彩而家超級英雄都多女性Fans，亦愈黎愈多女仔鐘意做運動，男士嘅喜好女士們開始接受。男士們不妨乘機帶你女朋友接觸下你嘅興趣，平衡返你地兩個人嘅活動，等雙方都可以重新喺拍拖中滿足到自己興趣？

一個讚好，是對我的一點支持。
如果想分享給其他朋友的話，請標明出處並附上專頁網址。
FACEBOOK：https://www.facebook.com/MaoYanDe
TUMBLR：http://moyinday.tumblr.com/
Fanpiece：http://women.fanpiece.com/moyinday/
圖片來源：網絡取材。