《拍咗拖,阿強冇得再食辣》

毛言地 於 21/01/2018 發表 收藏文章
  世上最遙遠嘅距離可能唔係生與死,而係一個鍾意食辣嘅人同一個唔食得辣嘅人一齊。

 

  阿強係個無辣不歡嘅人,佢曾經講過打邊爐可以唔要豉油,但湯底唔係辣嘅就不如唔好打。但好衰唔衰佢而家個女朋友連咖喱魚蛋都接受唔到,譚仔都只係會叫清湯,係唔食得辣嘅最好代表。有一次我地一班人出嚟食飯,阿強女朋友都在場,當我例牌問下大家有咩唔食嗰陣,佢女朋友講咗一句「唔係辣就冇問題」。

 

  全檯靜哂。

 

  點解?因為我地食嘅係泰國嘢。我一早諗定要叫冬陰功、咖哩蟹、馬拉盞通菜、仲有要多辣嘅串燒拼盤,而家冇啦,咩都要再諗過。可能佢見勢色唔對路,即刻補咗句「唔緊要啦你地照叫都得」,咁我地又冇咁衰仔,緊係回一句「咁又唔好,叫啲唔辣架啦」。最後湯就冇叫、蟹變咗明爐煮魚、通菜用蒜蓉炒、而串燒就用燒牛肉代替,再加蠔餅啊大蝦沙律咁,我人生第一次食泰國嘢成檯都唔係辣。食完飯各散東西,阿強喺群組同大家Say哂 Sorry,又跪又拜(當然係表情符號啦)咁,仲話下星期全男班食飯,幾辣都得,佢請。

 

  我地揀咗間四川嘢,叫嘢食緊係交由強哥負責啦,而佢又真係叫嘅全部嘢都係辣,仲特別叫人全部大辣。我地一班朋友緊係笑住叫佢講「喂唔洗咁喎,都冇人怪你」,「係囉,一餐半餐唔辣有咩所謂」。點知佢一抬頭已經流住兩行馬尿,然後用好感動嘅聲線同我地講:

 

  「我成三個月冇食過辣,你地就陪我癲返晚啦好嘛?」

 

  當晚嘅阿強就好似薜家燕食住周星馳嘅黯然銷魂飯一樣,每一啖都流露住滿足嘅神情,甚至每道菜上檯時佢都會用一種好特別嘅眼神去望住碟嘢,後嚟我終於諗到點去形容,就好你第一眼望到啱啱出世嘅仔咁。依個時侯我就知阿強真係等咗今晚餐飯好耐。飲飽食醉,一班男人自然乜都講一餐,有個朋友問阿強有冇後悔搵咗個唔食辣嘅女朋友。可能你覺得咁問好Mean,但男人嘛,邊會計較依啲。只見阿強放低個茶杯,講咗一句「如果要我喺女朋友同辣揀一個,我都係會揀我女朋友」。

 

  能夠令阿強講得出依句,阿嫂一定係個好女仔。

 

  「咁今晚你算唔算偷情?」

  「又話放棄食辣,頭先又咁感動。」

  「乜食完辣都會變聖人Mode咩?」

 

  只係一班朋友只係掛住搵位笑佢,而阿強都講哂粗口回應,不過大家都係笑笑口,心裡面都為阿強搵到好女朋友開心。

 

  兄弟,咪就係咁。

 

FACEBOOK:https://www.facebook.com/MOYINDAY
TUMBLR:http://moyinday.tumblr.com/
Fanpiece:http://women.fanpiece.com/moyinday/
Medium:https://medium.com/@moyinday

標籤: 毛言地  愛情    女朋友  兄弟  

留言

會員
我要評論
請按此登錄後留言。未成為會員? 立即註冊
快捷鍵:←
快捷鍵:→