安全套,用定唔用?

毛言地 於 26/04/2016 發表 收藏文章

  食色性也,對性既渴求唔需要人教,每個人都會有。細個好奇總會睇報紙風月版,再大個啲就識上去某個PK網站睇片,性係每個後生仔都一定會努力去自我學習既一課。到你開始拍拖,某日送女朋友到佢屋企樓下,臨走佢同你講今個星期六屋企冇人,不如上去佢度?你吞一吞口水,做個OK手勢,心入面仲開心過中六合彩,你終於可以正式脫離青頭仔既行列。係開心既同時,你突然間諗起你之前睇過一個廣告:保護自己,要有一套。你走到去便利店,望住收銀下面既陳列架,心思思唔知揀邊隻好,又怕比人望到你買,結果行黎行去成五六分鐘,等間鋪冇乜人,你先敢拎起幾包薯片放係收銀前面再即刻拎起杜記是但一盒扔係幾包薯片下面,買完野連收銀都唔敢望就咁行左出去。到星期六,你去到女朋友度,纏綿一番後準備入戲肉,就係你地肉帛相見準備探險既時候,你女朋友唔比你入,然後問你買左安全套未?係果一刻,你突然唔想拎出黎。男人有時就係咁犯賤,做之前乜都得,到埋牙果下始終都係想打真軍。但係你女朋友堅持要有套先肯做,你唯有死死地氣咁拎出黎。到底安全套,用定係唔用?


  安全套又叫保險套,顧名思義佢既出名係為左令大家可以有安全性行為同更加保險:唔洗出現爸爸唔好唔要我既結局。而家既安全套除左講求基本功能,仲有好多增添情趣既設計,好似係凸點同熱感。生產商用盡方法去提升你地係魚水之歡果陣既投入感同快感,強調用左就好似冇用一樣。但無論點講都好,你既分身套住左一層膠就係套住左,點都呃唔到自己冇用到,依點亦都係好多男性唔肯用既原因,唔可以直接同你既伴侶有最親密既接觸,好似唔係真真正正咁佔有佢地咁。但你要記住扑野係生物學角度係叫做交配,射精唔係純粹得果陣既快感,而係為左生育下一代。仲讀緊書既你,係咪咁快就準備好為人類既繁殖出一分力?我唔講你有冇錢先,好多學生哥識個女朋友都係靠睇樣,覺得佢靚就追,而學生妹見你樣唔差又成日陪佢傾電話粥得閒請佢食飯睇戲通常就乜都應承你,做男朋友又好,想食禁果都好。但你準備好應付搞大左人個肚之後上佢屋企認係經手人未?你準備好未了解乜野係愛情既你咁快就要照顧個女仔未?而個女仔又準備好大住個肚咁返學,受盡人冷眼,甚至被迫退學做主職師奶未呢?唔好以為射係出面就得,係做既過程當中你分身分泌出既前列線液係含有精子既,而要搞大你女朋友個肚的話,唔洗多,一粒就夠。所以身為學生既你,帶住個套可能冇無套個感覺咁舒服真實,但身為青頭仔或者冇乜經驗既你,有得搞已經係一種福氣,淨係聽條女既呻吟聲同叫你大力啲都已經足夠彌補返個安全套帶走既果小小快感,到最後射落個套,你攬住女朋友既胴體大汗疊細汗咁,咪一樣已經係大個仔囉。


  到你再大啲,識得落蘭桂坊玩識得落吧蒲,又可能有機會係果度識到一啲周圍等仔溝既女人。你見到個啱心水既,埋去同佢打個招呼傾下傾,佢又肯理你,大家有傾有講飲多兩杯落肚。依個時候個女人瞓落你度,同你講依度好嘈,你即刻識做咁帶住佢離開間吧,順手同你朋友講聲拜拜,然後直接返你屋企或者去附近既時鐘酒店。五年前你既初戀同初夜你就話想佔有佢唔想用套姐,到左今晚你唔應該會再有唔用套既念頭。畢竟面前依位靚女,你除左知佢叫CANDY同佢電話號碼之外就一無所知,佢同咩人搞過?果條友有冇性病?甚至依位CANDY有冇性病你都唔知。連前戲你都唔敢用口,佢想用嘴幫你舒服舒服你都要帶左個套先。你雖然醉,雖然好希望解決生理需要,但都好清楚有啲野真係搏唔過。衰啲講句,一夜夫妻既佢有冇中招你可能唔太關心,你更加驚既係唔用套激戰一晚之後,從此椰菜花梅毒甚至愛滋病就會跟住你。帶返個套,你可以盡情玩唔同花式去滿足你自己,甚至係臨射果陣拎出黎除套射到佢成身都係。你好滿足咁望住你自己既戰績,望住佢上氣唔接下氣個樣,然後就沖個涼準備瞓或者回氣之後黎多一次,到第二朝著番件衫再出門口,同佢講聲拜拜。可能你地已經約左幾時再出黎「聚一聚」,或者今次就係你地最後一次見面,但最起碼你知道果晚係舒服、難忘、仲有安全。


  人鍾意由性當中得到快感,但好多人都因為一時快感而乜都唔諗,最後後悔莫及。我唔係話每次做都一定要帶套,但唔帶套既對像只應該係你老婆或者你肯定佢之後會係你老婆既女朋友。當然,如果你係果種牡丹花下死,做鬼也風流既大情聖,覺得寧願要愛滋都要無套獵食的話,咁我只可能係度同你講一聲:祝你好運。


一個讚好,是對我的一點支持。
如果想分享給其他朋友的話,請標明出處並附上專頁網址。
FACEBOOK:https://www.facebook.com/MaoYanDe
TUMBLR:http://moyinday.tumblr.com/  
Fanpiece:http://women.fanpiece.com/moyinday/
圖片來源:網絡取材。
標籤: 毛言地    安全套  

留言


請按此登錄後留言。未成為會員? 立即註冊
    快捷鍵:←
    快捷鍵:→