女追男,又如何?

毛言地 於 14/03/2016 發表 收藏文章
  轉眼又到三月十四號白色情人節。雖然傳統上白色情人節喺比男仔回禮表心意,但而家都冇乜人分得咁清楚,反正節日就係一個藉口比大家約自己嘅心儀對像,不論男女。但唔知點解到而家都仲有女仔覺得由自己主動約男仔會好唐突,仲係覺得約會同追求應該都係男性做主動。但有一個重點你要記住:對人有意思嘅係你,心思思想同佢去街嘅都係你,鍾意人就應該有行動而唔係白白流走個機會,依一點香港女性們都要記住。

  係而家乜都有人講求男女平等嘅香港之下,追求依回事其實男同女都可以做主動。只要遇到一個你認為適合嘅人就應該去馬,唔好到冇左先後悔,依個道理講到口臭,但仲係有人唔明。又要鍾意人,但又要人做主動,成日話比哂暗示男仔都唔識做,但又冇諗過鍾意人果個明明係你自己。睇中人果個係你、想同佢拍拖果個係你、對人日思夜想果個又係你,但點解仲要等人地做主動?難聽啲講句,咁樣同又要做雞又要拎貞節牌坊冇乜分別。

  當然,有人話女追男隔層紗,但我就絕對唔信依樣野嘅。男仔唔一定係有女溝佢就一定肯,男仔一樣會睇自己對個女仔有冇好感,雖然實有人會係「煮到埋黎就食」,但依一類人其實男女都有。不過女追男就算唔係冇難度都好,最起碼唔會比男追女更難先就一定嘅。冇邊個男仔會討厭有女仔主動搵自己,亦冇邊個男仔覺得女仔約自己會係有陰謀,就算唔係對你好有好感,只要時間就到而你又唔係令人討厭,我諗九成男仔都樂意應約。

  我明白比男仔追果種感覺好多女仔都好享受,但萬一先動心果個係你自己,盡早將佢據為己有先係你應該做嘅事。就算係你做主動,就算係你將個男仔追到手都好,他日拍拖果陣你咪一樣可以做個幸福的小女人,咪一樣有個你自己啱哂心水嘅男朋友錫住自己。一段甜蜜嘅關係先係你嘅目標,唔好為左一時三刻所謂嘅面子而放棄一個自己鍾意嘅人,唔抵。

  其實女仔追男仔果陣會擔心嘅事,所有追過女仔嘅男仔一樣有驚過,但每日咪一樣有無數男仔為左心儀女生而放手一搏?所有嘅「我驚」、「我怕」、「我覺得」都只係你比自己嘅逃避理由。唔好再怕,鼓起勇氣約自己鍾意嘅男仔,唔好再暗示比人知自己鍾意人地,即管大大方方咁同佢講一句「我鍾意你」。

  女追男又如何?你再一直扮斯文的話,話唔埋你就會從此孤獨終老。

一個讚好,是對我的一點支持。
如果想分享給其他朋友的話,請標明出處並附上專頁網址。
FACEBOOK:https://www.facebook.com/MaoYanDe
TUMBLR:http://moyinday.tumblr.com/  
Fanpiece:http://women.fanpiece.com/moyinday/
圖片來源:網絡取材,後期加工
標籤: 毛言地  女追男  愛情  

留言


請按此登錄後留言。未成為會員? 立即註冊
    快捷鍵:←
    快捷鍵:→