女人夠嗲是好是壞?

毛言地 於 26/11/2016 發表 收藏文章
  嗲,係一種最攞命嘅行為。

  受嘅人(通常係男人)一見女人嗲下自己就即刻冇哂主見,條女話乜就乜,睇個樣就知佢比人嗲到骨都痺埋;唔受嘅(通常係女人)一見到人地喺度嗲就覺反胃,大庭廣眾將聲線拉高八度講嘢聽多陣都會聾,做埋啲咁Cheap嘅行為真係影衰女人。好少人會喺中間,即係對嗲冇感覺,依班人應該可以準備上峨眉少林拜師。

  點解男人會鍾意女人嗲?試諗下有個女仔喺你身邊用把雞仔聲咁同你講「你好叻啊」或者「幫下我吖」,你會有一種虛榮感,覺得自己好利害,勁到個女仔當自己神咁拜。男人會覺得嗲係女人一種天生優勢(當然首先外表唔可以太差先),有邊個男人唔想喺女人面前Man啲型啲?有邊個唔想女人喺自己身邊就好似一隻被馴化嘅小綿羊咁?單單睇台妹喺港男心目中咁高分就知橋唔怕舊,嗲依回事男人幾時都受。我記得喺IVE讀書嗰陣有個同我參加咗同一學會嘅女同學同親男仔講嘢都雞仔咁嘅聲,雖然佢外形唔係特別出眾,但我諗唔少男仔比佢叫多幾次真係會有種飄飄然嘅感覺,而佢喺個學會入面都的確幾受人歡迎。
  
  嗲嘅好處固然係好容易令男人受落,但同時都好容易令女性討厭。一個女人嗲人喺另一個女人眼中會覺得你「搏乜」,覺得你好似一個女人公敵咁,每次望到你同男人觸聲細氣講嘢就覺你特別討厭。就好似我啱啱講緊嗰位雞仔聲同學就有個同我同班嘅女仔好頂佢唔順,每次個雞仔聲同我打完招呼傾兩句之後,如果同我同班個女同學喺我隔離踠話當雞仔聲行開冇耐佢就會同我講「都唔知佢想點嘅」,然後就由佢把聲踩到佢個樣。唔好以為只有女人唔鐘意人嗲,喺某啲情況下太過火嘅話甚至會連男人都頂唔順。例如喺地鐵見到一對情侶有親密舉動本來我都唔會反感,畢竟係人之常情,以前嘅自己都會咁做。但如果個女人不停嗲住咁叫「BB豬」,又或者把雞仔聲由荃灣尖到落中環一直嗲住個男朋友食咩玩咩買咩嘅話,嗰種旁若無人嘅態度男女都會為之側目。我仲記得有次同朋友去飲杯嘢,坐喺我地對面嘅係一對中年男女,佢地嗰種親暱行為同個婦人半鹹淡廣東話發揮緊嘅嗲功比我嘅感覺只有「全部都係雞」。

  女人要嗲唔係問題,但應該要睇清楚環境同目標先。你嗲都係想要得到個好印像,如果最後討好唔到仲要得失其他人嘅話就係正宗嘅得不償失,比你嗲過一眾台妹都冇用。

一個讚好,是對我的一點支持。
如果想分享給其他朋友的話,請標明出處並附上專頁網址。
FACEBOOK:https://www.facebook.com/MaoYanDe
TUMBLR:http://moyinday.tumblr.com/
Fanpiece:http://women.fanpiece.com/moyinday/
圖片來源:網絡取材
標籤: 毛言地    女性  

留言


請按此登錄後留言。未成為會員? 立即註冊
    快捷鍵:←
    快捷鍵:→