壞男人易溝女?

毛言地 於 16/05/2016 發表 收藏文章
  俗語都有講「男人唔壞,女人唔愛」。一個壞男人總係吸引到女人埋身。原因係咩呢?佢地TALK得,玩得,風趣又肯請你飲杯COCKTAIL。女人出得黎玩,當然想搵個隨時氹到自己咯咯笑既男人,而唔係出黎食左幾次飯先敢試下拖你隻手既純情小處男(痴女另計)。而對唔少男仕黎講,經常落去玩而又識到新女既玩家都會有我地口中壞男人既特質,亦都令到你葡萄到出汁。無可否認,佢地既女伴可能多過你一世人拍過拖次數既幾倍,甚至係幾十倍,但係壞男人,又係咪真係咁好做?

  要做壞男人,第一步就係將愛放係第二、三甚至第四位。女神對佢地黎講基本上係唔存在,佢地眼中只有獵物。睇上眼既就會出擊,成功既就有下一步,失敗既就還原基本步,搵過另一個。佢地之所以可以做到咁灑脫,原因就係佢地奉信森林有好多樹,唔會為左一棵停落黎。係今晚,佢愛既係CANDY,聽晚就會變左AMY。一個長情既男人唔會做到壞男人,就係因為佢唔可以對一個岩岩經過既女人立刻發動攻勢。愛情當中既先認識,理解再發展對壞男人黎講係多餘既行為,佢地只會先尋找,然後挑逗,最後直接跳到肉體關係果一步。認識?了解?到第二朝講完再見之後,好可能連佢咩名都唔知,因為根本冇問過。

  係愛情,時間佔左一定既比重,而內在優點亦可以係當中發揮出黎。但對於將速食文化發揮到極致既壞男人黎講,外在優點先係致勝既不二法門。靚仔、大隻加上口甜舌滑,係你要成為壞男人最應該有既基本條件,正如係CLUB場你會先望高挑、靚女加上身材豐滿既女人一樣。細心有禮之類既好處其實毫無作用,因為個個壞男人其實都擺明車馬係為左滿足下半身而出動,點解明知係咁都有女肯受落?因為唔只男人先有性需要。雙方係今晚,或者之後耐唔耐出黎約戰滿足純粹既生理需要,又點會理會你係咪好仔又或者淑女,佢地只會要求你滿足到佢視覺同性慾上既滿足。

  至於睇緊篇文既你,又係咪一個壞男人?就算唔係都唔需要葡萄。可能壞男人唔愁冇女伴,但每個女伴一齊既時間都唔會長,即係MK仔所謂既食散餐。想搵到個女仔同佢長遠發展既話,壞男人絕對唔岩你做。而且你想搵既係斯斯文文閒日同朋友係去食飯睇戲照顧貓狗既女人的話,係CLUB場搵到既機會仲難中過六合彩。壞男人同你本身既感情觀完全唔同,壞男人會話你哂咁多時間去追一個未必追到既女仔係白痴,而你亦會覺得一個月同幾個女人上床既人係濫交。就算比機會你做壞男人,到最後你亦都會唔習慣。就好似食回轉壽司果陣,你只係鍾情於食三文魚,但你對面果個就但求就手,見到野食就拎。咁你當然唔可以好似佢咁密密食唔停手,但係你等到你心儀既三文魚之後,自然會有屬於你依個純情男既滿足感。

  所謂道不同不相為謀。明知你自己唔係做壞男人既材料,就無需羨慕人地精彩既夜生活。你始終都係果個鍾意左MARY三年既小明,又或者係同JOYCE拍左五年拖既阿豪。女伴換不停可能有佢既過癮之處,但係長情專一對女朋友好既好男人,係離開蘭桂坊之後,一樣擁有自己既市場。又有可能,其實你果個晚晚去蒲去溝女既蒲精朋友,一樣葡萄緊你可以識到果個大學畢業出黎做野,戴住眼鏡好GFABLE既嘉欣。

一個讚好,是對我的一點支持。
如果想分享給其他朋友的話,請標明出處並附上專頁網址。FACEBOOK:https://www.facebook.com/MaoYanDe
TUMBLR:http://moyinday.tumblr.com/  
Fanpiece:http://women.fanpiece.com/moyinday/
標籤: 毛言地  愛情  男女關係  溝女  

留言


請按此登錄後留言。未成為會員? 立即註冊
  • 姜gary 於 17/05/2016 評論 NO. 1

    good

快捷鍵:←
快捷鍵:→