《喺連登入錯Post,然後我女朋友嬲咗我。》

毛言地 於 24/04/2018 發表 收藏文章
  雖然已經小上咗好多,但有時無聊都會開連登睇下,依個已經變咗做習慣。話說頭先食完飯,我坐咗喺梳化睇緊創意台,見到有個Post標顯寫住咩白滑豐滿噴血咁上下嘅嘢,咁就緊係Click入去啦。
 
 
  見到欣宜圖然後正評,個個都會咁做啦係咪?
 
 
  點知當我一Click入去,欣宜我就唔見啦,一個白滑好身材嘅女性真係差唔多全裸出現喺我面前。估唔到依個樓主咁惡毒,明知個個中慣伏,居然整個冇伏嘅Post去玩死人。點解會死人?因為喺我一Click入去嗰下,我女朋友啱啱喺後面行過嚟攬住我,然後親眼睇住個白滑靚女出現喺我部電腦當中。
 
 
  「好嘢啊你,我去洗碗你就偷偷地睇靚女。」我女朋友已經有啲黑面。
  「唔係啊,我原本想睇欣宜⋯⋯」
  「咩話?你想J欣宜?」
 
 
  講到依度佢已經冇再比我出聲,然後連珠爆發咁話我原來眼光咁獨特,唔怪得成日咁夜都唔瞓就係為咁搵機會J欣宜,講講下仲拉埋上次為咗我買件情趣內衣我都唔覺興奮係因為欣宜:明明只係我唔明你點解要扮大律師,戴住個假髮真係唔啱我胃口,好地地扮空姐護士唔好咩?鬧完我一大輪,佢話今晚唔留喺我度瞓要走先,因為一諗起我有鋪咁嘅「癮」,佢就會打冷震。我嘗試拉住佢再解釋,但佢毫不猶豫就推開咗我,然後消失喺我視線當中。我打比佢唔聽,WhatsApp連藍剔都冇。
 
 
  我明嘅,男朋友J靚女當然唔開心,而家仲要以為我J欣宜,唔嬲就假。
 
 
  第二朝一早,我買咗佢最鐘意嘅豬腸粉多甜醬早餐喺佢樓下等,然後喺腦海入面不斷諗緊有冇方法可以氹到佢,解釋佢知咩叫「正皮引伏」。點知當佢見到我喺度等緊佢嗰陣,佢居然主動行過嚟攬住我,然後錫咗我一啖,就喺我未出聲嘅時候,佢同我講咗一句「原來你以為個Post入面係欣宜想正皮引伏,係咪呢。
 
 
  「點解你突然咁熟連登嘅喂。」
  「噚晚我打比個朋友呻,咪話佢知你做咗咩囉,然後佢就解釋我知係咩一回事,仲講咗好多連登嘢我知添。」
  「哦⋯⋯」我見到佢有個好明顯嘅黑眼圈。「佢同你傾咗好耐啊?你變咗成隻熊貓咁啦。」
  「係啊,我同佢傾咗成晚。」
  「你真係要介紹依個絲打朋友我識,等我好好多謝佢。」
  「吓?佢巴打嚟⋯⋯」
  「吓?你同個男仔傾通宵?」
  「你聽我講先⋯⋯」
  「邊度識,識幾耐,係咪想溝你,講。」而家到我嬲返佢轉頭。
 
 
  不過諗深一層,有咩都會同男女朋友講,時刻將最真嘅感情表露喺對方面前,耐唔耐打情罵俏咁先係一段健康感情嘛。
 
 
  你話我會唔會戴帽?哈,咪講笑啦。
 
 
  冇事嘅。
 
 
FACEBOOK:https://www.facebook.com/MOYINDAY
TUMBLR:http://moyinday.tumblr.com/
Fanpiece:http://women.fanpiece.com/moyinday/
Medium:https://medium.com/@moyinday
標籤: 毛言地  愛情  女朋友  連登  

留言


請按此登錄後留言。未成為會員? 立即註冊
    快捷鍵:←
    快捷鍵:→