喺現實,回憶就係情花毒。 文字

毛言地於 07/07/2017 發表 收藏文章
  或者你會覺得奇怪,點解好多人(特別係成日寫感情嘢嘅人,例如我)會咁記得以往同一個又一個嘅前度所發生嘅事,點解到咗今時今日都仲會咁大感觸。
 
 
  回憶就好比神鵰當中所寫嘅情花毒。中情花毒者只要回憶起生命最愛就會劇痛無比,生不如死;而喺現實,只要你經過你地曾經成日去嘅地方,或者飲返當初你地叫嘅第一杯酒,你總會記起當初嘅甜,然後再感受到失去嘅苦——當然唔會肝腸寸斷,但隱隱作痛仍然小不免。所以有好幾間餐廳酒吧,好幾個地方我已經好耐冇去,因為我仲記得同佢嚟嗰陣坐喺咩位,仲有嗰個幸福嘅笑容。當初兩個人相處嘅甜蜜地方,如今只得一人重遊舊地?不了。你可以話我逃避,你可以話我放唔低,一切都係事實:可免則免,有邊個會想自己被痛苦折磨?
 
 
  睹物唔單止思人,仲會思情。地方我可以唔去,但有二人回憶嘅物品我點都唔捨得扔棄。同好幾任前度嘅戲飛飛尾我仍然保留喺度,有時搵嘢執嘢見返啲飛尾,我仲會記得拖住佢睇戲嘅感覺,佢手傳嚟嘅溫度,我仲記得一次睇戲冇拉起個扶手而用一個好奇怪嘅姿勢拖住佢,結果比佢笑咗成晚,話我連拉起個扶手都唔識;又記得一次睇一部笑片,總算可以令嗰排心事重重嘅佢展露返久違嘅笑容。戲嘅內容我未必記得,但睇戲嗰陣同佢嘅種種反而深深刻喺我腦海裡面。仲有細個會買嘅MK情侶戒指、一支慶祝我簽咗作家約而送嘅鋼筆、兩個前度送嘅古龍水、親手一針一線整嘅電話繩等等,無論結果是甜是苦,唔同前度送嘅物品我仍然好好保存,因為每一樣物件都代表住一段關係嘅回憶,千金難買。
 
 
  對我嚟講,就算回憶再苦,諗起嗰陣個心再痛,我依然慶幸同佢地所經歷過嘅一切。會苦係因為不捨,會痛係因為愛過,生命中出現過一位又一位愛過自己嘅人仍然係一件快樂嘅事。若果被情花刺傷但發現心如止水,不痛不癢,我寧願痛到死來活去,起碼證明愛仍然冇離開過自己嘅生活。
 
 
  愛係自虐,但又如此難忘。
 
 
一個讚好,是對我的一點支持。
如果想分享給其他朋友的話,請標明出處並附上專頁網址。
FACEBOOK:https://www.facebook.com/MOYINDAY
TUMBLR:http://moyinday.tumblr.com/
Fanpiece:http://women.fanpiece.com/moyinday/
圖片來源:網絡取材
標籤: 毛言地  愛情  回憶  情花  

留言

會員
我要評論
請按此登錄後留言。未成為會員? 立即註冊
  • Chen Years X Eugene
    Chen Years X Eugene 於 10/07/2017 評論 NO. 1

    時間能解此毒!!

快捷鍵:←
快捷鍵:→