各花入各眼，邊個話一定要搵好女仔？ 精選

　　唔知幾時，大家將好女仔同好女朋友之間放咗一個等號：個女仔有學識好過冇讀書、唔食煙好過食煙、乖乖女好過蒲友、正經好過發姣⋯⋯十足十老一輩揀新抱咁。
　
　
　　但點解女朋友一家要搵好女仔？
　
　
　　各花入各眼，大家口味唔同，你鐘意才女乖乖女當然冇問題，但同樣MK妹姣婆一樣可以係一個「好女朋友」。咩為之好？其它方面我唔敢講，但感情上嘅好只需要佢符合到你所需就得。可能你鍾意你女朋友出街露膊露腰當街同你痴纏唔要面，你唔好旨意一個「好女仔」會比到你，反而大家口中嘅MK妹可能會啱哂你心水。　
　
　　好多人口中對MK妹評價好差（連登仔除外），認為佢地難登大雅，帶出去見朋友會失禮。Come On，香港地冇幾個拍拖可以從一而終，你可以唔飛人，但唔代表對方一定唔會飛你。如果你三十幾歲人要帶女朋友見屋企人準備結婚，要個女人持家有道嘅話MK妹未必係你杯茶，但如果你只係十幾廿歲，你拍拖只係要為滿足當時需要（需要咩？睇你囉），唔需要考慮咁多，只要條女出街肯搵個波挨落你隻手，開口埋口叫你「老公」同「BB」，滿足到你被愛同被需要嘅感覺，咁佢就係你喺嗰個階段嘅「好女朋友」。咩話？怕女朋友比朋友笑？後生仔有個MK女朋友先係人生贏家啊，唔阻你玩又任你魚肉，你準備迎接羨慕眼光就真。　
　
　　搵個女朋友最重要嘅係你自己鍾意，啲朋友叔伯長輩鬼知你嘅口味咩，而且班伯父口中一邊話女仔最緊要搵正經人家，轉個頭有啲接近停經期嘅庸脂俗粉行經佢地咪又係望唔停，都唔明講句嘢嘅說服力喺邊。唔好因為世俗眼光而揀女朋友，比著你搵到個世人認為完美嘅女朋大友都好，唔啱你的話你一樣唔會開心。所以即管跟隨住你嘅口味同需求去搵一個鍾意嘅人做女朋友，好女仔又好，MK妹蒲妹老江湖都好，你愛嘅女仔對你嚟講就係好嘢。
　
　
　　當然啦，前提係你輕鬆到咁多女排住隊比你揀囉。
　
　
FACEBOOK：https://www.facebook.com/MOYINDAY
TUMBLR：http://moyinday.tumblr.com/Fanpiece：http://women.fanpiece.com/moyinday/
Medium：https://medium.com/@moyinday