《原來我未準備好。》

毛言地 於 11/01/2018 發表 收藏文章
  當你嘅對象應承同你一齊嗰時,唔好開心住:因為仲有暗湧。
 
 
  乜你以為佢Say咗Yes就冇死咩?出街可以約好之後放飛機、買樓比完按金可以撻訂、就算求完婚你都可以結婚嗰日答一句「我唔願意」之後頭也不回走人。想成功追女仔的確需要氣氛同衝動嘅輔助,但當佢應承你嘅原因係因為一時衝動,當這幾日佢冷靜返,好快就知佢要搵嘅人唔係你。
 
 
  如果你曾經經歷過分手,你大概會明白分手後有段日子係幾咁漫無目的:突然唔洗瘋狂WhatsApp、冇咗晚晚電話粥、唔洗出街去拍拖,你就好似過緊一個好陌生嘅人生。生命中缺少咗一部份,潛意識會好快搵方法去彌補番,包括不停搵活動搵嘢做,如果依個時候有一個異性同你傾得埋啲,有啲部份大家好似好夾,或者係你同佢點呻佢都會聽好明白你咁,佢就會成為咗你最好嘅代替品:終於有個人可以好似前度咁,同你做返啲以往相似嘅活動——依個大概就係女性方面嘅諗法。
 
 
  不過代替品點都係代替品,你可以成為佢失戀期間最好嘅安慰劑,但當你成為咗佢男朋友,佢好快就會發現有啲問題:冇錯,或者你可以喺佢失落時陪到佢令佢冇咁難受,但你始終都成為唔到令佢感到快樂,再次感到熱戀感覺嘅人。當佢同你一齊,佢感受唔到你地係拍緊拖,然後開始覺得自己做錯決定,當初唔應該答應你嘅追求。佢可以接受到自己因為傷心而對住你喊、攬住你、甚至因為一時衝動而發生關係,但一切同你以前做過嘅事如果以你女朋友身份再經歷一次,佢唔單止感覺唔到半點開心,甚至會有反感嘅感覺:莫講話肉體關係,一個Kiss甚至最單純嘅拖手佢都覺得好唔自然。
 
 
  如果佢內疚,或者可能會有一日同你講原來佢未準備好,佢覺得同你冇咩火花、或者佢未準備好之類。無論佢嘅原因係點,你應該明白當初佢只係因為無助,因為你係最近最就手嘅代替品,大家先會發生咁大誤會。所以唔好以為佢應承你就搞掂,如果你發現頭一個星期大家冇嗰種見少陣都唔安落嘅熱戀感,又或者拖住佢都唔覺有種甜蜜感,你可能就要小心啲:有時男人嘅第六感都好準。
 
 
  拍拖,幾時都冇「食硬」依回事。
 
 
FACEBOOK:https://www.facebook.com/MOYINDAY
TUMBLR:http://moyinday.tumblr.com/
Fanpiece:http://women.fanpiece.com/moyinday/
Medium:https://medium.com/@moyinday
標籤: 毛言地  愛情  失戀  拍拖  

留言


請按此登錄後留言。未成為會員? 立即註冊
    快捷鍵:←
    快捷鍵:→